മുഖ്യമന്ത്രിയും മുഖ്യതന്ത്രിയും; യോഗി ആദ്യത്യനാഥ്​ ഡബിൾ റോളിൽ

ഗോരഖ്​പൂർ: കാർഷിക വായ്​പകൾ പിൻവലിക്കൽ, ആൻറി റോമിയോ സ്ക്വാഡ്​ രൂപീകരണം, പൊതുപരിപാടികൾ എന്നിങ്ങനെ മുഖ്യമന്ത്രിയുടെ റോളും ഗോരഖ്​നാഥ്​ ക്ഷേത്രത്തിലെ മുഖ്യതന്ത്രി സ്ഥാനവും ഒരുപോലെ കൈകാര്യം ചെയ്യുകയാണ്​ യോഗി ആദിത്യനാഥ്​. ഗോരഖ്​നാഥ്​ ക്ഷേത്രത്തിലെ മുഖ്യപുരോഹിതനാണ്​​ ഉത്തർപ്രദേശ്​ മുഖ്യമന്ത്രി യോഗി ആദിത്യനാഥ്​. ക്ഷേത്രത്തിലെ നവരാത്രി ആഘോഷങ്ങളുടെ ഭാഗമായുള്ള ചടങ്ങുകൾക്ക്​​ നേതൃത്വം വഹിക്കുന്നത്​ യോഗിയാണ്​.

വെള്ളിയാഴ്​ച ക്ഷേത്രത്തിൽ നടന്ന കന്യകാ പൂജക്ക്​ കാമികത്വം വഹിച്ചതും ആദിത്യനാഥായിരുന്നു.ദുർഗാ ക്ഷേത്രത്തിൽ വെള്ളിയാഴ്​ച പുലർച്ചെ മൂന്നു മണി മുതൽ ഏഴു മണിവരെ പൂജ നടത്തിയ അദ്ദേഹം പെൺകുട്ടികളുടെ പാദപൂജ നടത്തുന്ന ‘കന്യാ പൂജ’ ചടങ്ങും നിർവഹിച്ചു. ഒമ്പതു പെൺകുട്ടികളുടെ പാദപൂജ നിർവഹിച്ച യോഗി അവർക്ക്​ കുങ്കുമവും ഹാരവും ഷാളുമണിയിച്ചു. ക്ഷേത്രത്തിൽ കുട്ടികൾക്കായുള്ള സദ്യ വിളമ്പിയതും യോഗിയായിരുന്നു. 

നവരാത്രി ആഘോഷങ്ങളുടെ ഭാഗമായി അഞ്ചുദിവസം പ്രഭാത പ്രത്യേക പൂജകൾ നിർവഹിച്ചത്​ യോഗിയാണെന്ന്​ ക്ഷേത്രഭാരവാഹികൾ അറിയിച്ചു. 

ക്ഷേത്രത്തിലെ ചടങ്ങുകൾക്കു ശേഷം അദ്ദേഹം മുഖ്യമന്ത്രിയുടെ ഉത്തരവാദിത്വങ്ങളും നിർവേറ്റി. ദസഹ- മുഹറം ആഘോഷങ്ങൾക്കായുള്ള സുരക്ഷ ഏർപ്പെടുത്തതിനുള്ള പ്രദേശിക ഭരണചുമതലയുള്ളവരുമായുള്ള കൂടിക്കാഴ്​ച, ഡി.ജി.പി ഉൾപ്പെടെയുള്ള ഉന്നതതല ഉദ്യോഗസ്ഥരുമായുള്ള ചർച്ചകൾ എന്നിവയും മുഖ്യമന്ത്രിയുടെ നേതൃത്വത്തിൽ നടന്നു.

ശനിയാഴ്​ച ഗോരഖ്​നാഥ്​ക്ഷേത്രത്തിൽ നിന്നുള്ള ശോഭയാത്രക്കും നേതൃത്വം നൽകിയത് യോഗി ആദിത്യനാഥാണ്​.