കേന്ദ്രസർവകലാശാല ഹോസ്​റ്റൽ കെട്ടിടത്തിൽ കയറി ആത്​മഹത്യ ഭീഷണി

കാസർകോട്​: കാസർകോട്​ പെരിയയിലെ കേന്ദ്രസർവകലാശാല ഹോസ്​റ്റൽ കെട്ടിടത്തിന്​ മുകളിൽ കയറി ആത്​മഹത്യ ചെയ്യുമെന്ന്​ ഭീഷണി. 15 ലധികം വരുന്ന നാട്ടുകാരാണ്​​ ആത്​മഹത്യ ഭീഷണി മുഴക്കിയത്​. സർവകലാശാലയുടെ വികസനത്തിനായി സ്​ഥലം വിട്ട്​ കൊടുത്തവരാണ്​ ഇവർ. പുലർച്ചെ നാലോടെ കെട്ടിടത്തിനു മുകളിൽ കയറി ആത്മഹത്യാഭീഷണി മുഴക്കിയത്​.  കേന്ദ്ര സർവകലാശാലയ്ക്ക് ഭൂമി ഏറ്റെടുത്തപ്പോൾ കൃഷിയും വീടും നഷ്‌ടപ്പെട്ട മാളോത്തുംപാറ കോളനിയിലെ ആളുകളാണ് ആത്മഹത്യാഭീഷണി മുഴക്കുന്നത്.

സ്​ഥലം വിട്ട്​ കൊടുക്കു​േമ്പാൾ വാഗ്​ദാനം ചെയ്​ത ജോലിയും അടിസ്​ഥാന സൗകര്യങ്ങളും നൽകി ഇല്ലെന്നാരോപിച്ചാണ്​ പ്രതിഷേധം. സമരക്കാർക്ക്​ ജോലി വാഗ്​ദാനം നൽകിയില്ലെന്നും എന്നാൽ അവർക്ക്​ അടിസ്​ഥാന സൗകര്യങ്ങളെല്ലാം ഏർപ്പാടാക്കിയതാണെന്നും സർവകലാശാല അധികൃതർ പറഞ്ഞു.

പൊലീസും അഗ്നിശമനസേനയും ഇവരെ അനുനയിപ്പിക്കാൻ ശ്രമിക്കുന്നുണ്ടെങ്കിലും ഫലമുണ്ടായില്ല. ജില്ലാ കളക്ടർ സ്‌ഥലത്തെത്തി തങ്ങളുടെ ആവശ്യങ്ങൾ അംഗീകരിക്കുമെന്ന് രേഖാമൂലം ഉറപ്പ് നൽകണമെന്നാണ് ഇവരുടെ ആവശ്യം. പൊലീസും ആരോഗ്യവകുപ്പ് ഉദ്യോഗസ്‌ഥരും സ്‌ഥലത്ത് എത്തിയിട്ടുണ്ട്.