51കാരിയായ ഭാര്യയെ കൊലപ്പെടുത്തിയ കേസിൽ 29കാരന്​ ജാമ്യം

കൊച്ചി: 51കാരിയെ വിവാഹം കഴിച്ച ശേഷം സ്വത്ത്​ തട്ടിയെടുക്കാൻ രണ്ട്​ മാസത്തിനകം ഷോക്കടിപ്പിച്ച്​ കൊലപ്പെടുത്തിയ കേസിലെ പ്രതിയായ 29കാരന്​ ഹൈകോടതിയുടെ ജാമ്യം. കാരക്കോണം ത്രേസ്യാപുരം സ്വദേശിയും ഇൻഷുറൻസ് കമ്പനി ജീവനക്കാരിയുമായ ശാഖാകുമാരിയെ കൊലപ്പെടുത്തിയ കേസിൽ ഭർത്താവ്​ നെയ്യാറ്റിൻകര പത്താംകല്ല് സ്വദേശിയും സ്വകാര്യ ആശുപത്രി ജീവനക്കാരനുമായ അരുണിനാണ്​ ജസ്റ്റിസ്​ ബെച്ചു കുര്യൻ തോമസ്​ ഉപാധികളോടെ ജാമ്യം അനുവദിച്ചത്​. കേസിന്‍റെ വിചാരണ ആറുമാസത്തിനകം പൂർത്തിയാക്കാനും കോടതി നിർദേശിച്ചു.

2020 ഒക്ടോബർ 16നാണ് അരുൺ ശാഖാകുമാരിയെ വിവാഹം കഴിച്ചത്. ഒരു കുഞ്ഞുവേണമെന്നാവശ്യപ്പെട്ട് ശാഖാകുമാരി വഴക്കുണ്ടാക്കിയതിനെത്തുടർന്ന് 2020 ഡിസംബർ 26ന് ഇവരെ ഷോക്കടിപ്പിച്ചു കൊലപ്പെടുത്തിയെന്നാണ്​ കേസ്​. അറസ്റ്റിലായ അരുണിന്‍റെ ജാമ്യാപേക്ഷ 2021 മാർച്ച് 23ന്​ ഹൈകോടതി തള്ളിയെങ്കിലും കുറ്റപത്രം നൽകിയതിനാൽ ഏപ്രിൽ മൂന്നിന് മജിസ്ട്രേറ്റ്​ കോടതി ജാമ്യം നൽകി.

ഇതിനെതിരെ പ്രോസിക്യൂഷൻ നൽകിയ ഹരജിയിൽ 2022 ജൂൺ പത്തിന് സെഷൻസ് കോടതി ജാമ്യം റദ്ദാക്കി. ശാഖാകുമാരിയുടെ മുത്തശ്ശി ഹൈകോടതിയെയും സമീപിച്ചു. എന്നാൽ, പൊലീസിൽ കീഴടങ്ങാതിരുന്ന അരുണും സെഷൻസ് കോടതി ഉത്തരവിനെതിരെ ഹൈകോടതിയെ സമീപിച്ചു.

ഈ രണ്ട്​ ഹരജികളും പരിഗണിച്ച ഹൈകോടതി സിംഗിൾ ബെഞ്ച് പത്തുദിവസത്തിനകം ജാമ്യത്തിനായി സെഷൻസ് കോടതിയെയോ ഹൈകോടതിയെയോ സമീപിക്കാമെന്നും അതുവരെ അറസ്റ്റ് ചെയ്യരുതെന്നുമുള്ള നിർദേശത്തോടെ ജാമ്യം റദ്ദാക്കിയ സെഷൻസ് കോടതി ഉത്തരവ്​ ശരിവെച്ചു. തുടർന്ന് അരുൺ നൽകിയ ജാമ്യ ഹരജിയിലാണ്​ ജാമ്യം അനുവദിച്ചത്​.