ബീഫ് നിരോധനം മതാചാരങ്ങളെ ബാധിക്കുമെന്ന് ഹരജി

​കൊച്ചി: കശാപ്പിനായി മാടുകളുടെ വിൽപന തടഞ്ഞ കേന്ദ്ര സർക്കാർ ഉത്തരവ്​ മുസ്​ലിംകളുടെ ആചാരപരമായ ചടങ്ങുക​ളെ ബാധിക്കുമെന്ന്​ ഹരജി. ബീഫ്​ ​നിരോധനം ചോദ്യം ചെയ്​ത്​ ഹൈകോടതിയിൽ നിലവിലുള്ള ഹരജിയിൽ കക്ഷിചേരാൻ ജമാഅത്ത്​ കൗൺസിൽ സംസ്​ഥാന പ്രസിഡൻറ്​ എ. പൂക്കുഞ്ഞാണ്​ ഹരജി നൽകിയത്​.

ഇൗദുൽ അദ്​​ഹ പോലുള്ള വിശേഷ ദിവസങ്ങളുമായി ബന്ധപ്പെട്ട ചടങ്ങുകളെ ഇത്​ ബാധിക്കുമെന്ന്​ ഹരജിയിൽ പറഞ്ഞു. മൃഗബലി ഇൗദുൽ അദ്​​ഹയോടനുബന്ധിച്ച പ്രധാന ചടങ്ങാണ്​. കേന്ദ്ര ഉത്തരവ്​ പ്രകാരം കശാപ്പിനായി മൃഗങ്ങളെ കാലിച്ചന്തയിൽ ലഭ്യമാകില്ല. മതിയായ മാടുകളെ സംസ്​ഥാനത്തെ ഫാമുകളിൽ ഉൽപാദിപ്പിക്കുന്നില്ല. മറ്റു സംസ്​ഥാനങ്ങളിൽനിന്ന്​ മൃഗങ്ങളെ കൊണ്ടുവരുന്നതിന്​ പുതിയ ഉത്തരവ്​ തടസ്സമാണ്​. മൃഗങ്ങളുടെ വ്യാപാരം തടഞ്ഞുള്ള ഉത്തരവ്​ ഭരണഘടനാവിരുദ്ധമാണെന്ന​ും റദ്ദാക്കണമെന്നും ഹരജിയിൽ പറയുന്നു.