അവസാന നിമിഷം ദുബൈ യാത്ര മുടങ്ങി; കിയവിലെ ബങ്കറിനുള്ളിൽ സനാബിലും ഹനീനും

(ദുബൈയിലേക്ക്​ പുറപ്പെടുന്നതിന്​ മിനിറ്റുകൾക്ക്​ മുൻപ്​ വിമാനത്താവളം അടച്ചതിനെ തുടർന്ന്​ കീവിൽ കുടുങ്ങിയ മലയാളി വിദ്യാർഥി കണ്ണൂർ സ്വദേശി എസ്​.പി. സനാബിലും കോഴിക്കോട്​ സ്വദേശി കുനിയിൽ ഹനീനും അനുഭവം വിവരിക്കുന്നു)

പുറത്ത്​ എന്താണ്​ സംഭവിക്കുന്നതെന്ന്​ കൃത്യമായി അറിയില്ല. പല സ്ഥലങ്ങളിലും സ്​ഫോടന ശബ്​ദം കേൾക്കാം. ഹോസ്റ്റലിന്​ താഴെയുള്ള ബങ്കറിലാണ്​ ഞങ്ങളിപ്പോഴുള്ളത്​. ചെറിയ ബങ്കറിനുള്ളിൽ 300ഓളം പേരുണ്ട്​. കുപ്പിവെള്ളം അങ്ങി​ങ്ങായി കാണുന്നുണ്ട്​. എപ്പോൾ തീരുമെന്ന്​ പറയാൻ കഴിഞ്ഞില്ല. തീർന്നാൽ വീണ്ടും കിട്ടുമോ എന്നും അറിയില്ല. ഇരുട്ടുമുറിയാണിത്​. നിരവധി മലയാളികൾ ഇവിടെയുണ്ട്​. കിയവിന്​ ചുറ്റും റഷ്യൻ സൈന്യം എത്തിയതായി വാർത്തകളിൽ കാണുന്നുണ്ട്​. കൃത്യമായ വിവരങ്ങൾ എവിടെ നിന്നും ലഭിക്കുന്നില്ല. എപ്പോൾ വേണമെങ്കിലും വൈദ്യുതിയും ഇന്‍റർനെറ്റും നിലക്കാം. അതിന്‍റെ സൂചനകളായി ഇടക്കിടെ ഇന്‍റർനെറ്റ്​ തടസപ്പെടുന്നുണ്ട്​.

ദുബൈയിലെ ബന്ധുവിന്‍റെ അടുത്തേക്ക്​ പോകാമെന്ന ലക്ഷ്യത്തോടെ വ്യാഴാഴ്ച രാവി അഞ്ചിനാണ്​ കിയവ്​ വിമാനത്താവളത്തിനടുത്ത്​ എത്തിയത്​. ബസിൽ ഇരിക്കുമ്പോൾ തന്നെ വലിയ സ​്​ഫോടന ശബ്​ദം കേട്ടു. പുറത്തേക്ക്​ നോക്കുമ്പോൾ കണ്ടത്​ വിമാനത്താവളത്തിനുള്ളിൽ നിന്ന്​ എല്ലാവരും ചിതറിയോടുന്നതാണ്​. എന്‍റെ സുഹൃത്ത്​ യാത്രക്കായി വിമാനത്താവളത്തിനകത്തുണ്ടായിരുന്നു. എട്ട്​ മണിക്കായിരുന്നു അവളുടെ വിമാനം. എന്നാൽ, എല്ലാ വിമാനങ്ങളും റദ്ധാക്കിയതായി അറിയിപ്പ്​ ലഭിച്ചു. ഞങ്ങളെ ബസിൽ നിന്നിറങ്ങാൻ സമ്മതിച്ചില്ല.

കിയവിൽ തന്നെയുള്ള മറ്റൊരു ബസ്​ സ്​റ്റേഷനിലാണ്​ ഞങ്ങളെ ഇറക്കിയത്​. ആ സമയം മുതൽ ഇന്ത്യൻ എംബസിയുമായി ബന്ധപ്പെട്ടെങ്കിലും കാര്യമായ പ്രതികരണമുണ്ടായില്ല. അവിടെ ​​തന്നെ സുരക്ഷിതമായി നിൽക്കാനായിരുന്നു അവർ പറഞ്ഞത്​. ഒമ്പത്​ മണിക്കൂർ യാത്രയുണ്ട്​ ഞങ്ങളുടെ യൂനിവേഴ്​സിറ്റി ഹോസ്റ്റലിലേക്ക്​. അവിടേക്ക്​ മാറ്റാൻ പറഞ്ഞെങ്കിലും കാര്യമുണ്ടായില്ല. കൂടെയുള്ള സുഹൃത്ത്​ നേരിട്ട്​ എംബസിയിൽ പോയി കാര്യം പറഞ്ഞെങ്കിലും നടന്നില്ല. താമസം ശരിയാക്കാമെന്ന്​ ആദ്യം പറഞ്ഞെങ്കിലും ഇത്രയും പേർക്ക്​ താമസം നൽകാനാവില്ലെന്ന്​ എംബസി പിന്നീട്​ അറിയിച്ചു.

ഹോസ്റ്റലിലേ​ക്കോ​ ഹോട്ടലിലേക്കോ മാറണമെന്നായിരുന്നു അറിയിപ്പ്​. പക്ഷെ, ഇവയെല്ലാം അടഞ്ഞുകിടക്കുകയാണ്​. വൈകുന്നേരം വരെ ചില്ലുകൂട്​ പോലൊരു ബസ്​ സ്​റ്റോപ്പിനുള്ളിൽ നിന്നു. ആറ്​ മണിയോടെ യൂനിവേഴ്​സിററിയുമായി ബന്ധപ്പെട്ടു. ഇവരാണ്​ അടുത്തുള്ള മറ്റൊരു യൂനിവേഴ്​സിറ്റിയുടെ ഹോസ്റ്റൽ ഏർപാടാക്കിയത്​. അവിടെ നിന്നാണ്​ ഉച്ചയോടെ ബങ്കറിനുള്ളിലേക്ക്​ മാറ്റിയത്​.