സി.പി.എം-കോൺഗ്രസ് സംഘർഷത്തിൽ നാലുപേർക്ക് പരിക്ക്

എടക്കര (മലപ്പുറം): എടക്കര മൂത്തേടത്ത് സി.പി.എം, കോൺഗ്രസ് പ്രവർത്തകർ തമ്മിലുണ്ടായ സംഘർഷത്തിൽ നാലുപേർക്ക് പരിക്കേറ്റു. പരിക്കേറ്റ ഡി.വൈ.എഫ്.ഐ മൂത്തേടം മേഖല സെക്രട്ടറി ക്രിസ്​റ്റി ജോണിനെ എടക്കരയിലെ സ്വകാര്യ ആശുപത്രിയിലും കോൺഗ്രസ് പ്രവർത്തകരായ അജയ്, നൗഫൽ, നിഷാദ് എന്നിവരെ നിലമ്പൂർ ജില്ല ആശുപത്രിയിലും പ്രവേശിപ്പിച്ചു.

പ്രചാരണത്തി​െൻറ സമാപനദിവസം കാരപ്പുറത്ത് ഇരുവിഭാഗവും തമ്മിൽ വാക്കേറ്റവും ഉന്തും തള്ളുമുണ്ടായിരുന്നു. ഇത് ഇരുപാർട്ടികളുടെയും നേതാകൾ ഇടപെട്ട്​ പ്രശ്​നം തീർത്തിരുന്നു. എന്നാൽ, ഇതി‍െൻറ തുടർച്ചയായി മൂത്തേടം അങ്ങാടിയിൽ വ‍്യാഴാഴ്ച രാവിലെ പത്തരയോടെ സംഘർഷമുണ്ടാവുകയായിരുന്നു.

ബൈക്കിൽ വരുകയായിരുന്ന ക്രിസ്​റ്റിയെ കോൺഗ്രസ് പ്രവർത്തകർ ആയുധം ഉപയോഗിച്ച് ആക്രമിക്കുകയായിരുന്നെന്ന് സി.പി.എം നേതാക്കൾ പറഞ്ഞു. എന്നാൽ, സി.പി.എം നേതൃത്വം അക്രമം അഴിച്ചുവിടുകയാണെന്ന് കോൺഗ്രസ്​ ആരോപിച്ചു.