മതംമാറിയ  യുവതിയുടെ വിവാഹം ഹൈകോടതി റദ്ദാക്കി

കൊച്ചി: മതപരിവർത്തനം ചെയ്​ത യുവതിയുടെ വിവാഹം റദ്ദാക്കി മാതാപിതാക്കൾക്കൊപ്പം വിട്ടയച്ച്​ ഹൈകോടതിയുടെ ഉത്തരവ്​. വിവാഹത്തിന്​ മാതാപിതാക്കളുടെ പങ്കാളിത്തമില്ലെന്നും മറ്റൊരു സ്​ത്രീയെയും അവരുടെ ഭർത്താവിനെയും രക്ഷിതാക്കളാക്കി നടത്തിയ വിവാഹം സാധുവല്ലാത്തതും നിലനിൽക്കാത്തതുമാണെന്നും വിലയിരുത്തിയാണ്​ ഡിവിഷൻബെഞ്ചി​​​​െൻറ ഉത്തരവ്​. 

മത പരിവര്‍ത്തനം നടത്തി ഐ.എസില്‍ ചേര്‍ക്കാന്‍ തടഞ്ഞുവെച്ചിരിക്കുന്ന പെൺകുട്ടിയെ വിട്ടുകിട്ടണമെന്നാവശ്യപ്പെട്ട്​ പിതാവ്​ വൈക്കം സ്വദേശി അശോകൻ നൽകിയ ഹരജിയാണ്​ കോടതി പരിഗണിച്ചത്​. ​ഹരജി പരിഗണനയിലിരിക്കെയാണ്​ വിവാഹം നടന്നിട്ടുള്ളതെന്ന കാര്യവും ഉത്തരവ്​ പുറപ്പെടുവിക്കുന്നതിന്​ മുന്നോടിയായി ​കോടതി പരിഗണിച്ചു. ഭർത്താവിനൊപ്പം പോകണമെന്നാണ്​ പ്രായപൂർത്തിയായ പെൺകുട്ടി കോടതിയെ അറിയിച്ചതെങ്കിലും പൊലീസ്​ അകമ്പടിയോടെ സുരക്ഷിതമായി പെൺകുട്ടിയെ ഹോസ്​റ്റലിൽ നിന്ന്​ മാതാപിതാക്കൾക്കൊപ്പം വിടണമെന്ന്​ ​േകാട്ടയം എസ്​.പിക്ക്​ ഡിവിഷൻബെഞ്ച്​ നിർദേശം നൽകി.

പെണ്‍കുട്ടി തീവ്രവാദ ഗ്രൂപ്പി​​​​െൻറ തടങ്കലിലാണെന്നും സിറിയയിലേക്ക് കൊണ്ടുപോകാനുള്ള സാധ്യതയുണ്ടെന്നുമായിരുന്നു പിതാവ​ി​​​​െൻറ വാദം. ഇതിനിടയിൽ ഹരജിയില്‍ ഏഴാം എതിര്‍കക്ഷിയാക്കി ചേര്‍ത്തിരുന്ന സൈനബ എന്ന സ്ത്രീക്കൊപ്പം പോകാൻ ​പെണ്‍കുട്ടി താല്‍പര്യം പ്രകടിപ്പിച്ചതിനെ തുടർന്ന്​ അവർക്കൊപ്പം പോകാൻ അനുവദിച്ചിരുന്നു. പെണ്‍കുട്ടി പാസ്പോര്‍ട്ട് എടുത്തിട്ടില്ലെന്ന പൊലീസ് റിപ്പോര്‍ട്ടിന്‍േറയും തന്നെയാരും അനധികൃതമായി തട്ടിയെടുക്കുകയോ തടങ്കലില്‍ പാര്‍പ്പിക്കുകയോ ചെയ്തിട്ടില്ലെന്നുള്ള പെണ്‍കുട്ടിയുടെ മൊഴിയുടേയും അടിസ്ഥാനത്തിലാണ് അന്ന്​ ഡിവിഷന്‍ബെഞ്ച്​ പെൺകുട്ടിയെ പോകാൻ അനുവദിച്ചത്​. ഇതിനിടയിലാണ്​ പെൺകുട്ടി മുസ്​ലീം യുവാവുമായി 2016 ഡിസംബർ 19ന്​ വിവാഹിതയായത്​. പുത്തൂർ ജുമാ മസ്​ജിദ്​ ഖാദിയാണ്​ നിക്കാഹ്​ നടത്തിക്കൊടുത്തത്​. കേസ്​ നിലവിലിരിക്കെ പെൺകുട്ടി വിവാഹിതയായ നടപടിയെ കോടതി വിമർശിച്ചിരുന്നു. പിന്നീട്​ വിധി പറയാൻ മാറ്റിയ കേസിലാണ്​ ഇപ്പോൾ വിധിയുണ്ടായത്​.

​പെൺകുട്ടിക്കും മാതാപിതാക്കൾക്കും സുരക്ഷ ഉറപ്പാക്കണമെന്നും നിരന്തര നീരീക്ഷണമുണ്ടാകണമെന്നും വിധിന്യായത്തിൽ പറയുന്നു. പെൺകുട്ടിയെ നിർബന്ധിച്ച്​ മതം മാറ്റിയത്​ സംബന്ധിച്ച്​ പെരിന്തൽമണ്ണ, ചേർപ്പുളശേരി പൊലീസ്​ ​സ്​റ്റേഷനുകളിൽ നിലവിലുള്ള പരാതി സംബന്ധിച്ച അന്വേഷണം ഏറ്റെടുക്കണമെന്ന്​ ഡി.ജി.പിക്ക്​ കോടതി നിർദേശം നൽകി. മതം മാറ്റവുമായി ബന്ധപ്പെട്ട്​ ആരോപണ വിധേയമായ മഞ്ചേരിയിലെ  സത്യസരണി എന്ന സ്ഥാപനത്തെക്കുറിച്ചും അന്വേഷിക്കണം. എത്രയും വേഗം അന്വേഷണം പൂർത്തിയാക്കുകയും സംഭവത്തിൽ കുറ്റവാളികളുണ്ടെങ്കിൽ നിയമത്തിന്​ മുന്നിൽ കൊണ്ടുവരികയും വേണം. 

നേരത്തെ അന്വേഷണം നടത്തിയ പൊലീസ്​ ഉദ്യോഗസ്​ഥ​ന്​ വീഴ്​ച പറ്റിയിട്ടുണ്ടോയെന്ന്​ അ​​േന്വഷിക്കണം. വീഴ്​ച സംഭവിച്ചിട്ടുണ്ടെങ്കിൽ വകുപ്പു തല നടപടിയെടുക്കണമെന്നും വിധിയിൽ പറയുന്നു.  നേരത്തെ കോടതി ഉത്തരവ്​ പ്രകാരം സ്​ഥാപനത്തെയും സംഭവത്തെയും കുറിച്ച്​ പൊലീസ്​ അന്വേഷണം നടത്തിയെങ്കിലും പെണ്‍കുട്ടിയെ ആരും നിര്‍ബന്ധിച്ച് കൂട്ടിക്കൊണ്ടു പോയതല്ലെന്നും സ്വയം ഇസ്​ലാമില്‍ ആകൃഷ്​ടയായാണ് സത്യസരണിയിലത്തെിയതെന്നും പിന്നീട് സൈനബയുടെ സംരക്ഷണയില്‍ കഴിയുകയാണെന്നുമാണ് പൊലീസ് കോടതിയെ അറിയിച്ചത്.