കരുനാഗപ്പള്ളി സി.പി.എം ഏരിയാ കമ്മിറ്റി പിരിച്ചുവിട്ടു; വിഭാഗീയതയിൽ കടുത്ത നടപടി

കൊല്ലം: വിഭാഗീയത സംഘർഷത്തിലും തെരുവുയുദ്ധത്തിലും എത്തിയ സി.പി.എം കരുനാഗപ്പള്ളി ഏരിയ കമ്മിറ്റി പിരിച്ചുവിട്ടു. സി.പി.എം സംസ്ഥാന സെക്രട്ടറി എം.വി. ഗോവിന്ദൻ പങ്കെടുത്ത അടിയന്തര ജില്ല സെക്രട്ടേറിയറ്റ് യോഗത്തിലായിരുന്നു തീരുമാനം. തുടർന്ന് നടന്ന ജില്ല കമ്മിറ്റി യോഗവും ഈ തീരുമാനം അംഗീകരിച്ചു. ഏരിയക്ക് പുറത്തുള്ള ഏഴംഗങ്ങൾ അടങ്ങിയ​ അഡ്ഹോക്ക് കമ്മിറ്റിക്ക്​ താൽക്കാലിക ചുമതല നൽകുകയും ചെയ്തു. ഏരിയയിൽ നിന്നുള്ള സംസ്ഥാന-ജില്ല കമ്മിറ്റി അംഗങ്ങളാരും അഡ്​ഹോക്ക്​ കമ്മിറ്റിയിൽ ഉണ്ടാവില്ല.

ഇതോടെ കരുനാഗപ്പള്ളി ഏരിയയിൽനിന്ന്​ ആരുംതന്നെ കൊല്ലം ജില്ല സമ്മേളനത്തിലോ കൊല്ലത്ത് നടക്കുന്ന സംസ്ഥാന സമ്മേളനത്തിലോ പ്രതിനിധികളായി ഉണ്ടാവുകയുമില്ല. സംസ്ഥാന സമ്മേളനത്തിന്​ ശേഷമാവും കരുനാഗപള്ളി ഏരിയ സമ്മേളനം നടക്കുക. പാർട്ടിയെ സംബന്ധിച്ച്​ സമ്മേളന കാലഘട്ടത്തിലെ അസാധാരണ സംഭവമാണ്​ കൊല്ലത്ത്​ കഴിഞ്ഞ കുറേ ദിവസങ്ങളായി അരങ്ങേറിയത്​.

പാർട്ടി നേതാക്കൾക്കെതിരെ സാമ്പത്തിക- ലൈംഗിക ആരോപണങ്ങൾ ഉയർത്തി അണികളും പ്രാദേശിക നേതാക്കളും പ്രകടനം നടത്തുന്ന സ്ഥിതിയിലേക്ക്​ കാര്യങ്ങൾ എത്തിയതോടെയാണ്​ അടിയന്തര ജില്ല കമ്മിറ്റി ചേർന്നത്​. അച്ചടക്കലംഘനം വെച്ചുപൊറുപ്പിക്കില്ലെന്നും പാർട്ടിക്ക്​ അംഗീകരിക്കാൻ കഴിയാത്ത ഒരു നടപടിയും ആരുടെ ഭാഗത്തുനിന്നായാലും അനുവദിക്കില്ലെന്നും യോഗത്തിനുശേഷം എം.വി. ഗോവിന്ദൻ മാധ്യമ പ്രവർത്തകരോട്​ പറഞ്ഞു.