കോടനാട്​​ കേസ്​: അപകടത്തെക്കുറിച്ച്​ ഒാർമയില്ലെന്ന്​ രണ്ടാംപ്രതിയുടെ മൊഴി

കുഴൽമന്ദം: അപകടത്തിൽ പരിക്കേറ്റ്​ ചികിത്സയിൽ കഴിയുന്ന കോടനാട്​ എസ്​​റ്റേറ്റ്​ കൊലക്കേസിലെ രണ്ടാംപ്രതി കെ.വി. സയ​​െൻറ മൊഴി പാലക്കാട്​ പൊലീസ്​ രേഖപ്പെടുത്തി. പാലക്കാട്​ ടൗൺ സൗത്​ എസ്​.​െഎ ടി.വി. ശശിയുടെ നേതൃത്വത്തിലാണ്​ കോയമ്പത്തൂർ സ്വകാര്യാശുപത്രിയിലുള്ള സയ​​െൻറ ​െമാഴിയെടുത്തത്​. അപകടം സംഭവിച്ചത്​ ഒാർമയില്ലെന്നും ആശുപത്രിയിൽ ബോധം തെളിഞ്ഞപ്പോഴാണ്​ അപകടമറിയുന്നതെന്നും സയൻ മൊഴി നൽകി.

കുടു​ംബത്തോടൊപ്പം പഴനി ക്ഷേത്രദർശനത്തിനുശേഷം പൊള്ളാച്ചിയിലെത്തി ഭക്ഷണം കഴിച്ചെന്നും ഇതിനുശേഷം സ്വദേശമായ ഇരിങ്ങാലക്കുടയിലേക്ക്​ പോകുകയായിരുന്നെന്നും സയൻ പറഞ്ഞു. രണ്ട്​ ദിവസമായി ശരിയായി ഉറങ്ങിയിരുന്നില്ല. യാത്രക്കിടെ കാർ നിർത്തി അൽപസമയം ഉറങ്ങിയെന്നും ഇയാൾ പറഞ്ഞു. ആവർത്തിച്ചുള്ള ചോദ്യങ്ങൾക്ക്​ ഒാർമയില്ലെന്നായിരുന്നു മറുപടി. കോടനാട്​ സംഭവത്തെക്കുറിച്ച്​ ചോദിക്കരുതെന്ന്​ തമിഴ്​നാട്​ പൊലീസ്​ ഉപാധി വെച്ചിരുന്നു.

ഭാര്യയെയും മകളെയും ഇരിങ്ങാലക്കുടയിലെ വീട്ടിലെത്തിച്ചശേഷം വിദേശ​േത്തക്ക്​ കടക്കാനായിരുന്നു പ്രതി ലക്ഷ്യമിട്ടതെന്ന്​ പൊലീസ്​ സൂചിപ്പിച്ചു. കോയമ്പത്തൂരി​ൽ ഇതിനുള്ള മുന്നൊരുക്കം നടത്തിയിരുന്നതായി പൊലീസ്​ പറഞ്ഞു. വിനുപ്രിയ, നീതു എന്നിവരുടെ വിശദമായ പോസ്​റ്റുമോർട്ടം റിപ്പോർട്ട്​ വ്യാഴാഴ്​ച ലഭിക്കും. ആരോഗ്യസ്ഥിതി മെച്ചപ്പെട്ടശേഷം സയനി​​െൻറ മൊഴി വീണ്ടും രേഖപ്പെടുത്തും.