ചുണങ്ങംവേലി മേഖലയിൽ മോഷ്ടാക്കളുടെ ശല്യം

ആലുവ: ചുണങ്ങംവേലി മേഖലയിൽ മോഷ്ടാക്കളുടെ ശല്യം. സമീപ നാളുകളിൽ വിവിധ സ്ഥലങ്ങളിൽ മോഷണവും മോഷണ ശ്രമങ്ങളും നടന്നു. കള്ളൻമാരുടെ ശല്യം മൂലം നാട്ടുകാർക്ക് ഉറക്കം നഷ്ടപ്പെട്ടിരിക്കുകയാണ്.

ചുണങ്ങംവേലി പേങ്ങാട്ടുശ്ശേരി പുക്കാട്ടുമൂഗൾ ഭാഗത്ത് വടക്കേതോലക്കര ബഷീറിന്‍റെ വീട്ടിൽ കഴിഞ്ഞ ദിവസം മോഷണ ശ്രമം നടന്നു. തലേ ദിവസം പത്തനായത്ത് മമ്മൂഞ്ഞിന്‍റെ വീട്ടിൽ കയറിയ മോഷ്ടാക്കൾ ഒന്നര പവന്‍റെ മാല മോഷ്ടിച്ചു.

കഴിഞ്ഞ ഞായറാഴ്ച പുലർച്ചെ നാല് മണിക്ക് മനയിൽ മുഹമ്മദ് കുഞ്ഞിന്‍റെ വീട്ടിൽ മേഷണം നടന്നു. പശുവിനെ കറക്കുവാൻ വാതിൽ തുറന്ന് പുറത്തിറങ്ങിയ സമയത്ത് കള്ളൻ അകത്ത് കയറുകയായിരുന്നു. രണ്ടര പവൻ സ്വർണ്ണവും രണ്ടായിരം രൂപയുമാണ് നഷ്ടമായത്. അലമാര തുറന്നാണ് മോഷ്ടിച്ചത്.

മുള്ളൻകുഴി തൈക്കാവിന് സമീപം പാലപറമ്പിൽ അബ്ദുൽ ഖാദറിന്‍റെ വീട്ടിലും മോഷണ ശ്രമം നടന്നിരുന്നു. കള്ളൻമാരുടെ ശല്യം രൂക്ഷമായപ്പോൾ പൊലീസിൽ പരാതി നൽകിയെങ്കിലും പരിഹാരമായിട്ടില്ലെന്ന് നാട്ടുകാർ ആരോപിക്കുന്നു.