ശിവഗിരി ബ്രഹ്മവിദ്യാലയ കനകജൂബിലി ആഘോഷം

തലശ്ശേരി: ശിവഗിരി ബ്രഹ്മവിദ്യാലയ കനകജൂബിലി ആഘോഷങ്ങൾ ജഗന്നാഥ ക്ഷേത്രാങ്കണത്തിൽ സംസ്ഥാന വഖഫ് ബോർഡ് മുൻ ചെയർമാൻ പാണക്കാട് റഷീദലി ശിഹാബ് തങ്ങൾ ഉദ്ഘാടനം ചെയ്തു. കലുഷിതമായ വർത്തമാനകാലത്ത് ഗുരുദർശനങ്ങളുടെ പ്രസക്തി ഏറിവരുകയാണെന്നും സാമൂഹികവിരുദ്ധരും തീവ്രവാദികളുമായ ചിലരുടെ ചെയ്തികൾമൂലം മതങ്ങളാണ് പലപ്പോഴും പഴികേൾക്കേണ്ടിവരുന്നതെന്നും അദ്ദേഹം പറഞ്ഞു. അഡ്വ.പി.കെ. രവീന്ദ്രൻ അധ്യക്ഷത വഹിച്ചു. സ്വാമി പ്രേമാനന്ദ, അഡ്വ.കെ. അജിത്കുമാർ, സജിത് നാരായണൻ എന്നിവർ സംസാരിച്ചു. മുതിർന്ന ശ്രീ നാരായണീയനും ഗ്രന്ഥകാരനുമായ വി.കെ. ഭാസ്‌കരനെ ആഘോഷ കമ്മിറ്റി വർക്കിങ് ചെയർമാൻ അഡ്വ.കെ. സത്യൻ പൊന്നാടയണിയിച്ച് ആദരിച്ചു. അഡ്വ. പി.വി. സൈനുദ്ദീൻ, സി. ഗോപാലൻ എന്നിവർ സന്നിഹിതരായി. ചന്ദ്രൻ സ്വാഗതവും രവീന്ദ്രൻ പൊയിലൂർ നന്ദിയും പറഞ്ഞു. ശ്രീനാരായണ ദാർശനിക സമ്മേളനം ഗുരുപ്രസാദ് സ്വാമികൾ ഉദ്ഘാടനം ചെയ്തു. ബോധിതീർഥ സ്വാമികൾ അധ്യക്ഷത വഹിച്ചു. സ്വാമി പ്രേമാനന്ദ, കാരായി ചന്ദ്രശേഖരൻ, എൻ. രേഷ്മ എന്നിവർ സംസാരിച്ചു. സി.കെ. സുനിൽകുമാർ സ്വാഗതവും ചന്ദ്രൻ എള്ളത്താൻ നന്ദിയും പറഞ്ഞു.