റാങ്ക്​ ലിസ്​റ്റ്​ കാലാവധി അവസാനിക്കുന്നു; നിയമനം കിട്ടാതെ ആയുർവേദ തെറപ്പിസ്​റ്റുകൾ

അധികൃതർക്ക്​ താൽപര്യം താൽക്കാലിക നിയമനം കോട്ടയം: ആയുഷ്​ വകുപ്പിൽ 300 തസ്​തിക അനുവദിച്ച മുൻ സർക്കാറി​ൻെറ തീരുമാനത്തിൽ തുടർനടപടികൾ ഉണ്ടാകാതായതോടെ സർക്കാർ ആയുർവേദ ആശുപത്രികളിലെ തെറപ്പിസ്​റ്റുകളുടെ നിയമന നടപടികൾ സ്​തംഭിച്ചു. വിവിധ ജില്ലകളിലെ റാങ്ക്​ ലിസ്​റ്റുകളുടെ കാലാവധി അവസാനിക്കാൻ രണ്ടുമാസം മാത്രമാണ്​ അവശേഷിക്കുന്നത്​. ഗുണപ്രദമായ ചികിത്സ നൽകണമെങ്കിൽ ഈ ആശുപത്രികളിൽ ആയുർവേദ തെറപ്പിസ്​റ്റുകളുടെ സേവനം അനിവാര്യമാണ്. ഡോക്ടർമാർ നിർദേശിക്കുന്ന ചികിത്സകൾ രോഗികളിൽ ചെയ്യാനാണ് തെറപ്പിസ്​റ്റുകളെ നിയോഗിക്കുന്നത്. എന്നാൽ, 130 ആശുപത്രികളിലായി 65ഓളം സ്ഥിരം തെറപ്പിസ്​റ്റുകൾ മാത്രമാണ് സംസ്ഥാനത്തുള്ളത്. ആണുങ്ങൾക്കും പെണ്ണുങ്ങൾക്കും ഓരോരുത്തർ എന്ന നിലയിൽ 10 കിടക്കക്ക് രണ്ട് തെറപ്പിസ്​റ്റ്​ വേണമെന്ന സർക്കാർ മാനദണ്ഡം നിലനിൽക്കെയാണ്​ നിയമനത്തിൽ വിമുഖത കാണിക്കുന്നത്​. ആരോഗ്യ കുടുംബക്ഷേമ വകുപ്പി​ൻെറ 19/2/2021ലെ 52/2021 നമ്പർ സർക്കാർ ഉത്തരവ് പ്രകാരം 80 ആയുർവേദ തെറപ്പിസ്​റ്റ്​​ തസ്തികകളും അനുവദിച്ചിരുന്നു. എന്നാൽ, ഇതുവരെ പ്രസ്തുത തസ്തികകൾക്ക് ധനവകുപ്പിൽനിന്ന്​ അംഗീകാരം ലഭിച്ചിട്ടില്ല. മൂന്നുവർഷമായി ജോലി കാത്തിരിക്കുന്ന 10 ജില്ലകളിലെ 200ഓളം ഉദ്യോഗാർഥികളുടെ ഭാവി ഇതോടെ അനിശ്ചിതത്വത്തിലായി. പത്താം ക്ലാസിനുശേഷം സർക്കാർ ആയുർവേദ കോളജിൽനിന്ന് ഒരുവർഷത്തെ തെറപ്പിസ്​റ്റ്​ കോഴ്സ് പാസാകുന്നവരെയാണ് സർക്കാർ ആശുപത്രികളിൽ നിയമനത്തിന് പരിഗണിക്കാറ്. ഇലക്കിഴി, പൊടിക്കിഴി, ഞവരക്കിഴി, പിഴിച്ചിൽ, നസ്യം, വസ്തി എന്നിവയിലൊക്കെ വിശദമായി പഠനം നടത്തി ആയുർവേദ കോളജുകളിൽനിന്ന് ഇറങ്ങിയ 2500ൽ അധികം പേർ ജോലിയില്ലാതെ കഴിയുകയാ​െണന്ന്​ ഉദ്യോഗാർഥികൾ പറയുന്നു. നിലവിൽ സംസ്ഥാന സർക്കാറും കേന്ദ്ര സർക്കാറും നടപ്പാക്കിയിരിക്കുന്ന വിവിധ പദ്ധതികൾ പ്രകാരം താൽക്കാലിക അടിസ്ഥാനത്തിൽ തെറപ്പിസ്​റ്റുകളെ നിയമിച്ചാണ് പല ആശുപത്രികളും പ്രവർത്തിക്കുന്നത്. അധികൃതർ താൽപര്യം കാണിക്കുന്നതും താൽക്കാലിക നിയമനത്തിനാണ്​. തെറപ്പിസ്​റ്റുകൾ ഇല്ലാത്ത ആശുപത്രികളിൽ മറ്റ് ജോലികൾക്ക് നിയമിക്കപ്പെട്ടവർ തെറപ്പി നടത്തുന്ന ഗുരുതരമായ സ്ഥിതിവിശേഷവും സംസ്ഥാനത്തുണ്ട്. പാചകക്കാരും ശുചീകരണ തൊഴിലാളികളും മറ്റുമായി ജോലിക്ക്​ കയറിയവർ ക്രമേണ രോഗികളെ ചികിത്സിക്കാൻ നിയോഗിക്കപ്പെടുന്നത് വലിയ പ്രത്യാഘാതം ഉണ്ടാക്കാറുണ്ട്.