മടവൂർ സി.എം സെന്‍റർ ആണ്ടുനേർച്ച നാളെ മുതൽ

കോഴിക്കോട്​: മടവൂര്‍ സി.എം സെന്‍ററിന്‍റെ നേതൃത്വത്തില്‍ സംഘടിപ്പിക്കുന്ന സി.എം വലിയുല്ലാഹിയുടെ 32ാം ആണ്ടുനേര്‍ച്ച മേയ് 11, 12, 13 തീയതികളില്‍ നടക്കുമെന്ന്​ ഭാരവാഹികൾ വാർത്തസമ്മേളനത്തിൽ അറിയിച്ചു. 11ന്​ രാവിലെ 9.30ന്​ സമസ്ത വൈസ് പ്രസിഡന്റ് അലി ബാഫഖി തങ്ങള്‍ കൊയിലാണ്ടി പരിപാടി ഉദ്ഘാടനം ചെയ്യും. 11നും 12നും രാവിലെ 10ന്​ ഫാമിലി മീറ്റ്​, രാത്രി ഏഴിന്​ മതപ്രഭാഷണം എന്നിവ നടക്കും. മേയ് 13ന്​ വൈകീട്ട്​ ഏഴിന്​ നടക്കുന്ന ദിക്‌റ് ദുആ ആത്മീയ സമ്മേളനം സമസ്ത പ്രസിഡന്റ് ഇ. സുലൈമാന്‍ മുസ്‌ലിയാര്‍ ഉദ്ഘാടനം ചെയ്യും. സി.എം സെന്റര്‍ ജനറല്‍ സെക്രട്ടറി ടി.കെ. അബ്ദുറഹ്‌മാന്‍ ബാഖവി സന്ദേശപ്രഭാഷണം നടത്തും. കാന്തപുരം എ.പി. അബൂബക്കര്‍ മുസ്‌ലിയാര്‍ സനദ് ദാന പ്രഭാഷണം നടത്തും. വാർത്തസമ്മേളനത്തിൽ മടവൂർ സി.എം സെന്‍റർ ജനറൽ സെക്രട്ടറി ടി.കെ. അബ്ദുറഹ്‌മാന്‍ ബാഖവി, കെ.കെ. അഹമ്മദ്​കുട്ടി മുസ്​ലിയാർ, ആലിക്കുട്ടി ഫൈസി, ടി.കെ.സി. മുഹമ്മദ്​ എന്നിവർ പ​ങ്കെടുത്തു.