ഗ്യാസ് സിലിണ്ടറിൽനിന്ന് തീപടർന്ന് വീടിന് തീപിടിച്ച് യുവതിക്ക് പൊള്ളലേറ്റു

കക്കട്ടിൽ: വട്ടോളിയിൽ വീട്ടിലെ ഗ്യാസ് സിലിണ്ടറിൽനിന്ന് അടുക്കളയിൽ തീപടർന്ന് യുവതിക്ക് പൊള്ളലേറ്റു. കുഞ്ഞിപ്പറമ്പത്ത് അഖിലിന്റെ വീട്ടിലുണ്ടായ തീപിടിത്തത്തിൽ ബന്ധു കൈവേലി തയ്യിൽ ഷീജക്കാണ് പൊള്ളലേറ്റത്. അടുക്കളഭാഗത്ത് പെയിൻറിങ് നടത്തിക്കൊണ്ടിരിക്കെ സിലിണ്ടറിൽനിന്നും ഗ്യാസ് ചോർന്ന് തൊട്ടടുത്ത് സൂക്ഷിച്ചിരുന്ന ടിന്നറിൽ (പെയിൻറ് നേർപ്പിക്കുന്ന ദ്രാവകം) തീപിടിക്കുകയും തീ ആളി ഫ്രിഡ്ജ്, വാഷിങ് മെഷീൻ, അലമാരകൾ, സ്വിച്ച് ബോർഡ് തുടങ്ങിയവ കത്തിനശിക്കുകയുമായിരുന്നു. വീട്ടുകാർ ഉടൻ പൈപ്പ് വെള്ളം ഉപയോഗിച്ച് തീ നിയന്ത്രണവിധേയമാക്കി. പരിക്കേറ്റ ഷീജയെ ആശുപത്രിയിലേക്ക് പ്രവേശിപ്പിച്ചു. സംഭവസ്ഥലത്തെത്തിയ നാദാപുരം അഗ്നിരക്ഷാസേന തീപിടിച്ച ഗ്യാസ് സിലിണ്ടറും മറ്റു വസ്തുക്കളും പുറത്തേക്ക് മാറ്റി.