പി.എസ്​.സി നിയമനം: ഒമ്പതിന് ​ലീഗ്​ വഖഫ് സംരക്ഷണ സമ്മേളനം

** വിഷയത്തില്‍ ലീഗ് ഒരു വിട്ടുവീഴ്ചക്കും തയാറ​ല്ലെന്ന്​ കുഞ്ഞാലിക്കുട്ടി മലപ്പുറം: വഖഫ് ബോര്‍ഡ് നിയമനങ്ങള്‍ പി.എസ്.സിക്ക് വിടാനുള്ള സര്‍ക്കാര്‍ തീരുമാനത്തിനെതിരെ ഈമാസം ഒമ്പതിന്​ മുസ്​ലിം ലീഗ്​ കോഴിക്കോട്ട്​​ വഖഫ്​ സംരക്ഷണ സമ്മേളനം നടത്തുമെന്ന്​ ദേശീയ ജനറൽ സെക്രട്ടറി പി.കെ. കുഞ്ഞാലിക്കുട്ടി പറഞ്ഞു. വെള്ളിയാഴ്​ച മലപ്പുറത്ത് ചേര്‍ന്ന നേതൃയോഗ ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. വൈകീട്ട്​ നാലിന്​ കോഴിക്കോട്​ കടപ്പുറത്താണ്​ പ്രതിഷേധ സംഗമം. വഖഫ് ബോര്‍ഡി​ൻെറ അധികാരത്തില്‍ കൈകടത്തി നശിപ്പിക്കുകയാണ് സര്‍ക്കാര്‍ ലക്ഷ്യം. വഖഫ്​ കേന്ദ്ര നിയമമാണ്​. ഇന്ത്യയൊട്ടാകെ ഇതിന്​ പ്രത്യാഘാതമുണ്ടാകും. മറ്റൊരു സംസ്ഥാനത്തും ഈ രീതി നിലവിലില്ല. ബി.ജെ.പി ഭരിക്കുന്ന സംസ്ഥാനങ്ങള്‍ ഇത് മാതൃകയാക്കിയാല്‍ വലിയ ദോഷം ചെയ്യും. ഇതി​ൻെറ അപകടം മനസ്സിലാക്കിയാണ്​ ലീഗ് സമരമുഖത്ത് ഉറച്ചുനില്‍ക്കുന്നത്. വിഷയത്തില്‍ ലീഗ് ഒരു വിട്ടുവീഴ്ചക്കും തയാറല്ല. വഖഫ് ബോര്‍ഡ് നിയമനം പി.എസ്.സിക്ക് വിടരു​െതന്ന ന്യായമായ ആവശ്യത്തെ വര്‍ഗീയമാക്കാന്‍ ശ്രമിക്കുന്നത് എതിര്‍ ചേരിയിലുള്ളവരാണ്. എന്തിനെയും വര്‍ഗീയവത്​കരിച്ചും വിഭാഗീയവത്​ക​രിച്ചും അവകാശങ്ങള്‍ അടിച്ചമര്‍ത്തുന്നത് ശരിയായ രീതിയല്ല. മുസ്​ലിം ലീഗ് നേതൃസമിതി തീരുമാനിച്ച പ്രക്ഷോഭ പരിപാടികളും ഇതോടനുബന്ധിച്ച് നടക്കും. നിയമനങ്ങള്‍ പി.എസ്.സിക്ക് വിട്ട നടപടി പുനഃപരിശോധിക്കണം. അല്ലാത്തപക്ഷം സര്‍ക്കാര്‍ തിരുത്തുന്നത് വരെ സമര പരിപാടികള്‍ ശക്തിപ്പെടുത്തും. സമ്മേളന​ ശേഷവും വിവിധ സമര പരിപാടികളുമായി മുന്നോട്ട്​ പോകുമെന്ന്​ അദ്ദേഹം വ്യക്തമാക്കി. അതേസമയം, പള്ളികളിൽ നടത്താനിരുന്ന ബോധവത്​കരണത്തെയും മുസ്​ലിം കോഓഡിനേഷൻ കമ്മിറ്റി യോഗവുമായി ബന്ധപ്പെട്ടുമുള്ള ചോദ്യങ്ങളിൽനിന്ന്​ അദ്ദേഹം ഒഴിഞ്ഞുമാറി. പാണക്കാട് സാദിഖലി ശിഹാബ് തങ്ങള്‍, സംസ്ഥാന ജനറല്‍ സെക്രട്ടറി ഇന്‍ ചാര്‍ജ് പി.എം.എ. സലാം, എം.എൽ.എമാരായ കെ.പി.എ. മജീദ്, എം.കെ. മുനീര്‍, പ്രഫ. ആബിദ് ഹുസൈന്‍ തങ്ങള്‍, അഡ്വ. എന്‍. ഷംസുദ്ദീന്‍, സെക്രട്ടറി അബ്​ദുറഹ്​മാന്‍ രണ്ടത്താണി എന്നിവർ യോഗത്തിൽ സംബന്ധിച്ചു.