അബൂദബി-ഇന്ത്യ യാത്രക്കാർക്ക്​ പി.സി.ആർ നിർബന്ധം

അബൂദബി: അബൂദബി വിമാനത്താവളത്തിൽനിന്ന്​ ഇന്ത്യയിലേക്ക്​ യാത്രചെയ്യുന്ന എല്ലാവരും 72 മണിക്കൂറിനുള്ളിലെടുത്ത പി.സി.ആർ ഫലം കരുതണമെന്ന്​ എയർ ഇന്ത്യ എക്സ്​പ്രസ്​. ഇന്ത്യയിൽ വാക്സിനെടുത്തവർക്കും ഈ നിബന്ധന ബാധകമായിരിക്കും. നേരത്തെ, ഇന്ത്യയിൽ നിന്ന്​ വാക്​സിനെടുത്തവർക്ക്​ യാത്രക്കു​ മുമ്പ്​ പി.സി.ആർ പരിശോധന ആവശ്യ​മില്ലെന്ന്​ എയർ ഇന്ത്യ ഉൾപ്പെടെയുള്ള വിമാനക്കമ്പനികൾ അറിയിച്ചിരുന്നു. ഇതിൽനിന്നാണ്​ അബൂദബിയെ ഒഴിവാക്കിയത്​. അതേസമയം, ദുബൈ ഉൾപ്പെടെയുള്ള മറ്റ്​ എമിറേറ്റുകളിൽനിന്ന്​ ഇന്ത്യയിലേക്ക്​ സഞ്ചരിക്കുന്നവർക്ക്​ പി.സി.ആർ ആവശ്യമില്ലെന്ന്​ എയർ അറേബ്യയും അറിയിച്ചു. ഇന്ത്യയിൽ നിന്ന്​ രണ്ട്​ ഡോസ്​ വാക്സിൻ പൂർത്തീകരിച്ചവർക്ക്​ മാത്രമാണ്​ ഇളവ്​. എയർ ഇന്ത്യ, എയർ ഇന്ത്യ എക്സ്​പ്രസ്​, ഗോ എയർ, സ്​പൈസ്​ ജെറ്റ്​ തുടങ്ങിയവർ നേര​േത്തതന്നെ ഈ ഇളവ്​ പ്രഖ്യാപിച്ചിരുന്നു. ഈ ഇളവ്​ ഭൂരിപക്ഷം പ്രവാസികൾക്കും ഉപകാരപ്പെടാത്തതാണെന്ന്​ ആരോപണം ഉയർന്നിരുന്നു. യു.എ.ഇയിലുള്ള നല്ലൊരു ശതമാനം പ്രവാസികളും ഇവിടെനിന്ന്​ വാക്സിനെടുത്തവരാണ്.