ഓട്ടോഡ്രൈവറെ പരിക്കേൽപിച്ച കേസിൽ യുവാവ് അറസ്റ്റിൽ

ഗൂഡല്ലൂർ: ഓട്ടോഡ്രൈവറെ ബ്ലേഡ് കൊണ്ട് മുഖത്ത് കീറി പരിക്കേൽപിച്ച കേസിൽ സമീപവാസി അറസ്റ്റിൽ. മേലെ ഗൂഡല്ലൂരിലെ ഓട്ടോഡ്രൈവർ സനോജ്കുമാറിനെയാണ് ​(25) മുഖത്ത് മുറിവുകളുമായി ഗൂഡല്ലൂർ ജില്ല ആശുപത്രിയിൽ പ്രവേശിപ്പിച്ചത്. തിങ്കളാഴ്ച രാത്രി വീടിനു സമീപത്തെ റോഡിൽ ഓട്ടോയിൽ കിടന്നുറങ്ങിയ സനോജ് കുമാറിന്‍റെ മുഖത്ത് ആരോ കീറിപ്പരിക്കേൽപിച്ച രീതിയിൽ മുറിവുകളുമായി കിടക്കുന്നത് കണ്ട്​ സമീപവാസികളാണ് രാവിലെ ആശുപത്രിയിൽ പ്രവേശിപ്പിച്ചത്. മദ്യലഹരിയിലായിരുന്ന ഇയാൾക്ക് ആരാണ് ആക്രമിച്ചതെന്ന് അറിയില്ലായിരുന്നു. അയൽവാസി മനോജിനെക്കുറിച്ച് സൂചന നൽകുകയായിരുന്നു. യുവാവിനെ പൊലീസ് പിടികൂടി ചോദ്യംചെയ്തതിൽ ഇയാൾ കുറ്റം സമ്മതിക്കുകയായിരുന്നു. ഇവർ തമ്മിൽ മുൻവൈരാഗ്യം ഉണ്ടായിരുന്നതായി പൊലീസ് പറഞ്ഞു. കോയമ്പത്തൂരിൽ ജോലിയിലുള്ള മനോജ്കുമാർ രാത്രി വരുമ്പോഴാണ് സനോജ്കുമാർ ഓട്ടോയിൽ കിടന്നുറങ്ങുന്നത് കണ്ടത്. ബ്ലേഡുകൊണ്ട് കീറി പരിക്കേൽപിച്ചശേഷം രക്ഷപ്പെടുകയായിരുന്നുവെന്ന് പ്രതി പൊലീസിനോട് പറഞ്ഞു. വധശ്രമം ഉൾപ്പെടെയുള്ള വകുപ്പിലാണ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. GDR SANOJ: മുഖത്ത് മുറിവുകളുമായി ആശുപത്രിയിൽ സനോജ്കുമാർ