മലപ്പുറത്ത്​ ഫ്രറ്റേണിറ്റി മാർച്ചിന്​ നേരെ ലാത്തിച്ചാർജ്​; നിരവധി പേർക്ക്​ പരിക്ക്​

മലപ്പുറം: ഓൺലൈൻ ക്ലാസുകൾ ആരംഭിച്ചിട്ടും വിദ്യാർഥികൾക്ക് പാഠപുസ്തകം ലഭ്യമാക്കാത്തതിൽ പ്രതിഷേധിച്ച് ഫ്രറ്റേണിറ്റി മൂവ്മ​െൻറ്​ മലപ്പുറം ജില്ല കമ്മിറ്റി ഡി.ഡി.ഇ ഓഫിസിലേക്ക് നടത്തിയ മാർച്ചിന് നേരെ പൊലീസ് ലാത്തിച്ചാർജ്​. നിരവധി പേർക്ക്​ പരിക്കേറ്റു.

സാരമായി പരിക്കേറ്റ ജില്ല കമ്മിറ്റിയംഗം അഖീൽ നാസിം, ആദിൽ ജാവേദ് കൂട്ടിലങ്ങാടി, നസീബ് മങ്കട എന്നിവരെ സ്വകാര്യ ആശുപത്രിയിലേക്ക്​ മാറ്റി.  പരിക്കേറ്റ മറ്റു വിദ്യാർത്ഥികളെ താലൂക്കാശുപത്രിയിൽ പ്രവേശിപ്പിച്ചു. സംസ്ഥാന കമ്മിറ്റിയംഗം ജംഷീൽ അബൂബക്കർ, മലപ്പുറം ജില്ല ജനറൽ സെക്രട്ടറി ഫയാസ് ഹബീബ്, ജില്ല സെക്രട്ടേറിയറ്റ് അംഗം അജ്മൽ തോട്ടോളി എന്നിവരടക്കം 16 പേരെ അറസ്റ്റ് ചെയ്തു.

മാർച്ചിന് നേരെ പ്രകോപനമില്ലാതെയാണ്​ പൊലീസ് അതിക്രമമഴിച്ചു വിട്ടതെന്ന്​ ഫ്രറ്റേണിറ്റി മൂവ്മ​െൻറ്​ ഭാരവാഹികൾ ആരോപിച്ചു. കോവിഡ് പ്രോട്ടോകോൾ ഉള്ളതിനാൽ കുറച്ച് വിദ്യാർഥികളാണ് സമരത്തിനുണ്ടായിരുന്നത്. മുൻകൂട്ടി പ്ലാൻ ചെയ്തവിധം വളഞ്ഞിട്ട് ദീർഘനേരം ലാത്തികൊണ്ടടിക്കുകയായിരുന്നുവെന്ന്​ ഇവർ പറഞ്ഞു. തീർത്തും സമാധാനപരമായാണ്​ മാർച്ച്​ നടന്നതെന്നും ബാരിക്കേഡ് പോലും സമരക്കാർ സ്പർശിക്കും മുമ്പേ ലാത്തി വീശിയതായും പ്രസ്​താവനയിൽ പറഞ്ഞു.

പാഠപുസ്തകങ്ങൾ ലഭ്യമാക്കാത്ത സർക്കാർ, പൊതു വിദ്യാഭ്യാസ വകുപ്പ്​ അനാസ്ഥയിൽ പ്രതിഷേധിച്ച്​​ സംസ്ഥാന വ്യാപകമായാണ്​ ഡി ഡി ഇ, എ ഇ ഒ ഓഫിസുകളിലേക്ക് മാർച്ച് നടത്തിയത്​. പാഠപുസ്തക അച്ചടിയും വിതരണവും കാലതാമസമില്ലാതെ പൂർത്തീകരിക്കുമെന്ന സർക്കാർ പ്രഖ്യാപനം ഇനിയും പാലിക്കപ്പെട്ടിട്ടില്ലെന്ന്​ ഭാരവാഹികൾ ചൂണ്ടിക്കാട്ടി. എല്ലാ വിദ്യാർഥികൾക്കും പാഠപുസ്തകം ലഭിക്കുന്നതു വരെ ഫ്രറ്റേണിറ്റി മൂവ്മ​െൻറ് സമര രംഗത്തുണ്ടാകുമെന്ന് പ്രതിഷേധക്കാർ പറഞ്ഞു. വിവിധയിടങ്ങളിൽ സംസ്ഥാന-ജില്ലാ നേതാക്കൾ മാർച്ച് ഉദ്ഘാടനം ചെയ്ത് സംസാരിച്ചു.

ജനാധിപത്യ പ്രതിഷേധങ്ങളെ പൊലീസ് കടന്നാക്രമിക്കുന്നു -ഷംസീർ ഇബ്റാഹിം
മലപ്പുറം: ജനാധിപത്യ പ്രതിഷേധങ്ങളെ പൊലീസ് കടന്നാക്രമിക്കുകയാണെന്ന് ഫ്രറ്റേണിറ്റി മൂവ്മ​െൻറ് സംസ്ഥാന പ്രസിഡൻറ്​ ഷംസീർ ഇബ്റാഹിം. പാഠപുസ്തകം ലഭ്യമാക്കാത്തതിൽ പ്രതിഷേധിച്ച് മലപ്പുറം ഡി.ഡി.ഇ ഓഫിസ്​ മാർച്ചിന് നേരെ പൊലീസ് നടത്തിയ അതിക്രമം ആസൂത്രിതമാണ്​. 

പ്രവർത്തകർ പോലീസിനെ ആക്രമിക്കുകയോ ബാരിക്കേഡിൽ തൊടുകയോ പോലുമുണ്ടായിട്ടില്ല. ഒരു പ്രതിഷേധത്തെ തടയുകയോ നേരിടുകയോ ചെയ്യേണ്ട സാമാന്യ രീതിയോ ക്രമസമാധാന പാലകർ എന്ന നിലയിൽ കാണിക്കേണ്ട പ്രാഥമിക മര്യാദകളോ കാണിക്കാതെയാണ് പൊലീസ് പെരുമാറിയതെന്ന്​ അദ്ദേഹം പറഞ്ഞു. വിദ്യാഭ്യാസ വകുപ്പിനെതിരായ സമരങ്ങളെ ഇങ്ങനെ നേരിടണമെന്ന് പൊലീസിന് നിർദേശം കിട്ടിയിട്ടുണ്ടോയെന്നും അദ്ദേഹം ചോദിച്ചു. പൊലീസ് ഭീകരതയെ വെറുതെ വിടാൻ തീരുമാനിച്ചിട്ടില്ലെന്നും നിയമപരമായും രാഷ്ട്രീയമായും നേരിടുമെന്നും ഷംസീർ ഇബ്റാഹിം പ്രസ്​താവനയിൽ പറഞ്ഞു.