മാതാവിനെ കൊന്ന കേസിലെ പ്രതി അയൽവാസിയുടെ ഓട്ടോറിക്ഷ അടിച്ചു തകർത്തു

തിരുവല്ല: തിരുവല്ലയിലെ നിരണത്ത് കൊലക്കേസ് പ്രതിയായ യുവാവ് അയൽവാസിയുടെ ഓട്ടോറിക്ഷ അടിച്ചു തകർത്തു. നിരണം പ്ലാമ്പറമ്പിൽ വീട്ടിൽ ബിജി ചാക്കോയാണ് അയൽവാസിയായ കൊടുവശ്ശേരി വീട്ടിൽ സുഭാഷിന്റെ ഓട്ടോ റിക്ഷ അടിച്ചു തകർത്തത്.

ഇന്ന് പുലർച്ചെയോടെ ആയിരുന്നു സംഭവം. സുഭാഷിന്റെ വീട്ടുമുറ്റത്ത് പാർക്ക് ചെയ്തിരുന്ന ഓട്ടോറിക്ഷ ബിജി ചാക്കോ കമ്പി വടി ഉപയോഗിച്ച് അടിച്ച് തകർക്കുകയായിരുന്നു.

മാതാവിനെ വെട്ടിക്കൊലപ്പെടുത്തിയ കേസിൽ വിചാരണ നേരിടുന്ന ബിജി ചാക്കോ അയൽവാസിയുടെ ബൈക്ക് കത്തിച്ച കേസിൽ പിടിയിലായി രണ്ടാഴ്ച മുമ്പാണ് ജാമ്യത്തിൽ ഇറങ്ങിയത്. ഒളിവിൽ പോയ പ്രതിക്കായുള്ള അന്വേഷണം ഊർജ്ജിതമാക്കിയതായി എസ്.ഐ പറഞ്ഞു.