തേക്ക്​ മോഷണം അറിയിച്ച യുവാവിന്‍റെ മൃതദേഹം ചാക്കിൽ കെട്ടിയ നിലയിൽ; കൊലപാതകമെന്ന്​ പൊലീസ്​

ചക്കരക്കൽ (കണ്ണൂർ): പൊതുവാച്ചേരി കനാലില്‍ കണ്ടെത്തിയ മൃതദേഹം നാലു ദിവസം മുമ്പ്​ കാണാതായ ചക്കരക്കല്‍ പ്രശാന്തിനിവാസില്‍ പ്രജീഷി​േന്‍റതാണെന്ന്​ പൊലീസ്​ സ്ഥിരീകരിച്ചു. മരണം കൊലപാതകമാണെന്നും പൊലീസ്​ അറിയിച്ചു.

തിങ്കളാഴ്ച രാവിലെ പത്തിന്​ പൊതുവാച്ചേരി മണിക്കിയിൽ അമ്പലത്തിന്​ സമീപം കരുണൻ പീടികക്ക്​ മുന്നിലുള്ള കനാലിലെ കുറ്റിക്കാട്ടിലാണ് മൃതദേഹം കണ്ടെത്തിയത്. കൊലപാതകത്തിന് കാരണം മോഷണവിവരം പൊലീസിനെ അറിയിച്ചതാണെന്നാണ് സൂചന.

താഴെ മൗവ്വഞ്ചേരിയില്‍ പ്രവൃത്തി നടക്കുന്ന വീട്ടിൽനിന്ന്​ നാല്​ ലക്ഷം രൂപയുടെ തേക്ക് മരം മോഷണം പോവുകയും ഇതുമായി ബന്ധപ്പെട്ട് ആഗസ്റ്റ്​ ഒമ്പതിന് മിടാവിലോട് കൊല്ലറേത്ത് വീട്ടിൽ അബ്​ദുൽ ഷുക്കൂർ (43), പൊതാവാച്ചേരി മാക്കുന്നത്ത് ഹൗസിൽ എ. റിയാസ് (36) എന്നിവർ

അറസ്റ്റിലാവുകയും ചെയ്തിരുന്നു. റിമാൻഡിലായ പ്രതികള്‍ പിന്നീട്​ പുറത്തിറങ്ങി. മോഷണം അധികൃതരെ അറിയിച്ചത് പ്രജീഷാണെന്നും ഇയാളുടെ ജീവന് ഭീഷണിയുണ്ടായിരുന്നതായും നാട്ടുകാരും ബന്ധുക്കളും പറയുന്നു.

നാലു ദിവസം മുമ്പാണ്​ പ്രജീഷിനെ കാണാതാവുന്നത്. ബന്ധുക്കള്‍ നല്‍കിയ പരാതിയെ തുടർന്നാണ്​ പൊലീസ് അന്വേഷണമാരംഭിച്ചത്. ഇതിനിടയിലാണ്​ പ്രജീഷി​േന്‍റതെന്ന്​ സംശയിക്കുന്ന ചെരുപ്പുകള്‍ ചക്കരക്കല്‍കുട്ടി കുന്നിലെ ആളൊഴിഞ്ഞ പറമ്പില്‍നിന്നും കിട്ടിയത്. ഡോഗ് സ്‌ക്വാഡും പൊലീസും നടത്തിയ അന്വേഷണത്തിലാണ് മൃതദേഹം തിങ്കളാഴ്‌ച രാവിലെ പൊതുവാച്ചേരി കരുണൻ പീടികക്ക്​ സമീപം കനാലില്‍നിന്നും ചാക്കില്‍ കെട്ടിയ നിലയില്‍ കണ്ടെത്തിയത്.

ചക്കരക്കൽ പൊലീസ് ഇൻക്വസ്റ്റ് നടത്തിയ മൃതദേഹം പോസ്റ്റുമോർട്ടത്തിനായി കണ്ണൂർ ഗവ. മെഡിക്കൽ കോളജ്​ ആശുപത്രിയിലേക്ക് മാറ്റി. കണ്ണൂർ ഫോറൻസിക് യൂനിറ്റ് ഓഫിസർ പി. ശ്രീജയുടെ നേതൃത്വത്തിൽ ഫോറൻസിക് വിഭാഗം പരിശോധന നടത്തി.

കണ്ണൂർ ഫയർഫോഴ്സ് യൂനിറ്റ് എ.എസ്.പി ഉണ്ണികൃഷ്ണൻ, ജൂനിയർ ഫയർ അസിസ്റ്റന്‍റ്​ സ്റ്റേഷൻ ഓഫിസർ കെ. കുഞ്ഞിക്കണ്ണൻ എന്നിവരുടെ നേതൃത്വത്തിലാണ് മൃതദേഹം പുറത്തടുത്തത്.

സ്പെഷൽ ബ്രാഞ്ച് ഡിവൈ.എസ്​.പി ജസ്റ്റിൻ ജോസഫ്, ഡിവൈ.എസ്.പി പി.പി. സദാനന്ദൻ, ചക്കരക്കൽ സി.ഐ സത്യനാഥൻ, എടക്കാട് സി.ഐ എം. അനിൽകുമാർ, എസ്.ഐ മഹേഷ് കണ്ടമ്പേത്ത് തുടങ്ങിയവർ സംഭവസ്ഥലത്തെത്തി പരിശോധന നടത്തി. പ്രജീഷിന്‍റെ മരണം കൊലപാതകമാണെന്ന് സംശയിക്കുന്നതായും പോസ്റ്റുമോര്‍ട്ടം റിപ്പോര്‍ട്ട് ലഭിച്ചാല്‍ ഉടന്‍ ഇതിന്​ പിന്നില്‍ പ്രവര്‍ത്തിച്ചവരെ അറസ്റ്റ്​ ചെയ്യുമെന്നും ചക്കരക്കല്‍ സി.ഐ അറിയിച്ചു.

ചക്കരക്കൽ പ്രശാന്തി നിവാസിൽ ശങ്കര വാര്യർ - സുശീല ദമ്പതികളുടെ മകനാണ് പ്രജീഷ്. സഹോദരങ്ങൾ: പ്രവീൺ, പ്രസാദ്.