അനധികൃത മരംമുറി: സി.ബി.ഐ അന്വേഷണഹരജി ഹൈകോടതി തള്ളി

കൊച്ചി: സംസ്ഥാനത്ത് അനധികൃതമായി മരം മുറിച്ചെന്ന കേസുകൾ സി.ബി.ഐ അന്വേഷിക്കണമെന്ന ഹരജി ഹൈകോടതി തള്ളി. ഡൽഹിയിലെ ഫ്രീലാൻസ് പത്രപ്രവർത്തകനും മലയാളിയുമായ പി. പുരുഷോത്തമൻ നൽകിയ പൊതുതാൽപര്യഹരജിയാണ്​ ചീഫ്​ ജസ്​റ്റിസ്​ അടങ്ങുന്ന ഡിവിഷൻ ബെഞ്ച്​ തള്ളിയത്​.

സംസ്ഥാന ഏജൻസികൾ അന്വേഷിക്കുന്നുണ്ടെന്നും ഇതിന്​ കോടതി മേൽനോട്ടം വഹിക്കുന്നതിൽ എതിർപ്പില്ലെന്നുമുള്ള സർക്കാർ വിശദീകരണം രേഖപ്പെടുത്തിയാണ്​ ഹരജി തള്ളിയത്​. സർക്കാർ ഉത്തരവി​െൻറ മറവിൽ വനത്തിൽനിന്ന് വൻതോതിൽ മരങ്ങൾ മുറിച്ചത് രാഷ്​ട്രീയക്കാരുടെയും ഉദ്യോഗസ്ഥരുടെയും പിന്തുണയോടെയാണെന്നായിരുന്നു ഹരജിയിലെ ആരോപണം.

സംസ്ഥാന ഏജൻസിയുടെ അന്വേഷണം കാര്യക്ഷമമാകില്ല എന്നതിനാൽ സി.ബി.ഐ വേണമെന്നായിരുന്നു ആവശ്യം. വനഭൂമിയിൽ നിന്നല്ല മരങ്ങൾ മുറിച്ചതെന്നും വനം കൊള്ളയല്ല നടന്നതെന്നും സർക്കാർ വിശദീകരിച്ചു. ഇതിൽ സി.ബി.ഐക്ക്​ ഇടപെടാനാവില്ലെന്നും ചൂണ്ടിക്കാട്ടി.