ഇവിടെയുണ്ട്​, ലോകത്തിലെ ഏറ്റവും ചെറിയ മനുഷ്യൻ

ദുബൈ: ജീവിച്ചിരിക്കുന്നവരിൽ ലോകത്തിലെ ഏറ്റവും ചെറിയ മനുഷ്യനെന്ന ഗിന്നസ്​ റെക്കോഡ്​ സ്വന്തമാക്കി അഫ്​ഷിൻ ഇസ്മായിൽ ഗാദർസാദ്​. വെറും 65.24 സെന്‍റീമീറ്റർ (2 അടി 1.68 ഇഞ്ച്​) മാത്രമാണ്​ ഈ 20 വയസുകാരന്‍റെ ഉയരം. ഇറാൻ സ്വദേശിയായ അഫ്​ഷിൻ റെക്കോഡ്​ സ്ഥാപിക്കാനാണ്​ ദുബൈയിലെത്തിയത്​.

ഇവിടെ നടന്ന വാർത്തസമ്മേളനത്തിൽ ഗിന്നസ്​ വേൾഡ്​ റെക്കോഡ്​ എഡിറ്റർ ഇന്‍റ ചീഫ്​ ക്രെയ്​ഗ്​ ഗ്ലൻഡേയാണ്​ പുതിയ റെക്കോഡുകാരനെ പ്രഖ്യാപിച്ചത്​. പിതാവ്​ ഇസ്മായിലിനും മാതാവ് ഖാത്തൂനുമൊപ്പമാണ്​​ അഫ്​ഷിൻ ദുബൈയിൽ എത്തിയത്​. 70.21 സെന്‍റീമീറ്റർ ഉയരമുള്ള കൊളംബിയക്കാരൻ എഡ്വേഡ്​ നിനോ ഹെർണാണ്ടസിന്‍റെ റെക്കോഡാണ്​ അഫ്​ഷിൻ മറികടന്നത്​.

രണ്ടോ മൂന്നോ വയസുള്ള കുട്ടിയുടെ വസ്ത്രങ്ങൾ അഫ്​ഷിന്​ പാകമാണ്​. ഖുർദിഷും പേർഷ്യൻ ഭാഷയും മാത്രമാണ്​ അവന്​ വഴങ്ങുന്നത്​. പ്രസവത്തോടെ തന്നെ ഇവരുടെ രണ്ട്​ മക്കൾ മരിച്ചിരുന്നു. അഫ്​ഷിൻ ജനിച്ചപ്പോൾ 700 ഗ്രാം മാത്രമായിരുന്നു ഭാരം. അതുകൊണ്ട്​ തന്നെ, നിരവധി ജനിതക വൈകല്യങ്ങൾ അവരുണ്ടായിരുന്നു. അഫ്​ഷിനെ പോലെ തന്നെ ഉയരം കുറഞ്ഞവർ കുടുംബത്തിൽ വേറെയുമുണ്ട്​. സാധാരണ തൊഴിലാളിയാണ്​ പിതാവ്​ ഇസ്മായിൽ.

അഫ്​ഷിന്‍റെ ചികിത്സ ചെലവ്​ താങ്ങാനുള്ള സാമ്പത്തിക ശേഷി ഈ കുടുംബത്തിനില്ല. അഫ്​ഷിന്‍റെ ദൈനം ദിന കാര്യങ്ങൾക്ക്​ മാതാപിതാക്കളിലൊരാളുടെ സഹായം എപ്പോഴും വേണ്ടി വരുന്നു. പുറത്തിറങ്ങുമ്പോഴും രണ്ടിൽ ഒരാൾ ഒപ്പമുണ്ടാവും. സ്കൂളിൽ പോകാൻ കഴിഞ്ഞിട്ടില്ല. അടുത്തിടെ സുഹൃത്ത്​ ഫോൺ സമ്മാനിച്ചെങ്കിലും ഉപയോഗിക്കാൻ ബുദ്ധിമുട്ടാണെന്ന്​ അഫ്​ഷിൻ പറയുന്നു.

ഒരുപാട്​ സമയം ഫോൺ കൈയിൽ പിടിക്കാനോ നടക്കാനോ കഴിയില്ല. മാതാപിതാക്കളെ സഹായിക്കുക എന്നതാണ്​ അവന്‍റെ ഏറ്റവും വലിയ സ്വപ്നം. ഈ ​ലോകറെക്കോഡ്​ ഏതെങ്കിലും വിധത്തിൽ അതിന്​ സഹായകരമാകുമെന്ന പ്രതീക്ഷയിലാണ്​ അഫ്​ഷിൻ.

ലോകകപ്പിലും അഫ്​ഷിന്​ ഇഷ്ടതാരങ്ങളും ടീമുമുണ്ട്​. ഇഷ്ട താരം മെസ്സിയും ക്രിസ്റ്റ്യാനോയുമാണെങ്കിലും ഈ ലോകകപ്പ്​ ജയിക്കാൻ സാധ്യത ഫ്രാൻസാണെന്ന്​ അവൻ പറയുന്നു. മുൻ ഇറാനിയൻ നായകൻ അലി ദായിയും അഫ്​ഷിന്‍റെ ഇഷ്ടതാരമാണ്​.

മുൻ റെക്കോഡുകൾ:

2010 ഏപ്രിലിലാണ്​ 70.21 സെന്‍റീമീറ്ററുള്ള എഡ്വേഡ്​ നിനോ ഹെർണാണ്ടസ്​ ലോകറെക്കോഡിട്ടത്​. എന്നാൽ, ഒക്​ടോബറിൽ നേപ്പാളിലെ ഖഗേന്ദ്ര ഥാപ്പ (67.08 ​സെന്‍റീമീറ്റർ) ഈ റെക്കോഡ്​ മറികടന്നു. 2011ൽ ഫിലിപ്പെൻസിന്‍റെ ജൂൺറി ബാലാവിങ്​ (59.93) പുതിയ റെക്കോഡിട്ടു. 2012ൽ നേപ്പാളിലെ ചന്ദ ബഹ്​ദൂർ ലോകത്തിലെ ഏറ്റവും ചെറിയ മനുഷ്യനായി.

54.6 സെന്‍റീമീറ്ററുള്ള ബഹദൂറായിരുന്നു ലോകത്ത്​ ജീവിച്ചിരുന്നവരിൽ ഏറ്റവും ചെറിയ മനുഷ്യൻ. എന്നാൽ, 2015ൽ അദ്ദേഹം മരണപ്പെട്ടു. ഇതിന്​ പിന്നാലെ താപ മഗറും ബാലാവിങും മരിച്ചതോടെ റെക്കോഡ്​ വീണ്ടും നിനോ ഹെർണാണ്ടസിലെത്തി. ഈ റെക്കോഡാണ്​ ഇപ്പോൾ അഫ്​ഷിൻ തകർത്തത്​.