കാനനപാത താണ്ടി ശബരിമലയിൽ എത്തിയത് 35,000 തീർഥാടകർ

ശബരിമല: മണ്ഡലകാലം പാതി പിന്നിട്ടതോടെ കാനന പാതയിലൂടെ തീർഥാടക പ്രവാഹം. 35000ലധികം പേരാണ് 18 ദിവസം കൊണ്ട് കാനനപാതയിലൂടെ ശബരിമലയിലെത്തിയത്. വെള്ളിയാഴ്ചയാണ്​ ഏറ്റവുമധികം പേർ യാത്ര ചെയ്തത്​.

പുൽമേട്, മുക്കുഴി, വണ്ടിപ്പെരിയാർ, സത്രം, പുൽമേട്, കരിമല പാതയിലെ അഴുതക്കടവ് തുടങ്ങിയ സ്ഥലങ്ങളിലൂടെയാണ്​ കാനന പാത. ഇരു പാതയിലൂടെയും രാവിലെ ആറു മുതലാണ് തീർഥാടകർക്ക് പ്രവേശനം.

ഉച്ചക്ക്​ ഒരു മണിവരെ പ്രവേശന കവാടത്തിൽ എത്തുന്ന എല്ലാ തീർഥാടകർക്കും പ്രവേശനം ലഭിക്കും. മഴ മാറിയതോടെ കാനന പാത സുരക്ഷിതവും സഞ്ചാരയോഗ്യവുമാണെന്ന് വനം വകുപ്പ് അറിയിച്ചു.