ബൈക്ക് യാത്രികന്‍റെ അശ്രദ്ധ; വാഹനാപകടത്തില്‍ യുവതിക്ക് ദാരുണാന്ത്യം

തൃപ്പൂണിത്തുറ: ബൈക്ക് യാത്രികന്‍റെ അശ്രദ്ധയെ തുടർന്നുണ്ടായ വാഹനാപകടത്തില്‍ സ്‌കൂട്ടര്‍ യാത്രക്കാരിക്ക് ദാരുണാന്ത്യം. ഉദയംപേരൂര്‍ നടക്കാവ് എസ്.എന്‍.ഡി.പി സ്‌കൂളിന് സമീപം സിദ്ധാര്‍ത്ഥം വീട്ടില്‍ സിബിന്‍റെ ഭാര്യ കാവ്യ (26) ആണ് മരിച്ചത്. എസ്.എന്‍. ജങ്ഷനടുത്തുള്ള അലയന്‍സ് ജങ്ഷനിലെ യൂ ടേണിനു സമീപം 8.45ഓടെയായിരുന്നു അപകടം.

പിറകിലായി വന്ന മറ്റൊരു ബൈക്ക് യാത്രക്കാരന്‍ കാവ്യയുടെ സ്‌കൂട്ടറിനെ മറികടക്കുകയും ഉടനെ തന്നെ അലക്ഷ്യമായി യൂ-ടേണ്‍ തിരിയുന്നതിനായി വെട്ടിക്കുകയും ചെയ്തു. ഇതോടെ റോഡിലേക്ക് മറിഞ്ഞു വീണ കാവ്യയെ തൊട്ടുപിറകെയുണ്ടായിരുന്ന ബസ് ഇടിക്കുകയായിരുന്നു. ഉടനെ തന്നെ സമീപത്തുണ്ടായിരുന്നവര്‍ ആശുപത്രിയിലെത്തിച്ചെങ്കിലും യാത്രാമധ്യേ മരിച്ചു.

അപകടത്തിന് കാരണക്കാരനായ കാഞ്ഞിരമറ്റം സ്വദേശി വിഷ്ണു(29)വിനെ ഹില്‍പാലസ് പൊലീസ് കസ്റ്റിഡിയിലെടുത്തു. അപകടം സംഭവിച്ചിട്ടും വിഷ്ണു ബൈക്ക് നിര്‍ത്താതെ പോവുകയായിരുന്നു.

കടവന്ത്രയിലെ സിനര്‍ജി ഓഷ്യാനിക്ക് സര്‍വിസ് സെന്‍ററിലെ സീനിയര്‍ എക്‌സിക്യൂട്ടിവായി ജോലി ചെയ്തുവരികയായിരുന്നു കാവ്യ. ഏക മകന്‍: സിദ്ധാര്‍ത്ഥ്.