കറുകച്ചാൽ: ഓട്ടോറിക്ഷയും കാറും കൂട്ടിയിടിച്ചുണ്ടായ അപകടത്തിൽ ഗുരുതര പരിക്കേറ്റ് ചികിത്സയിൽ കഴിഞ്ഞ ഓട്ടോ ഡ്രൈവർ മരിച്ചു. നെടുംകുന്നം മാന്തുരുത്തി ഈശുപറമ്പിൽ ഇ.ജെ. വർഗീസ് (കുട്ടപ്പൻ -72) ആണ് മരിച്ചത്. ശനിയാഴ്ച വൈകീട്ട് 6.30ന് ചങ്ങനാശ്ശേരി-വാഴൂർ റോഡിൽ ചമ്പക്കര പള്ളിപ്പടിക്ക് സമീപമായിരുന്നു അപകടം. വാഴൂർ ഭാഗത്തേക്ക് പോയ ഓട്ടോയും എതിരെ വന്ന കാറുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ ഓട്ടോ റോഡിൽ മറിഞ്ഞു. അപകടത്തിൽ വർഗീസിനും ഒപ്പമുണ്ടായിരുന്ന രണ്ട് യാത്രക്കാർക്കും പരിക്കേറ്റു. കോട്ടയം മെഡിക്കൽ കോളജ് ആശുപത്രിയിൽ ചികിത്സയിൽ കഴിയവെ തിങ്കളാഴ്ച വൈകീട്ടോടെ മരിച്ചു. ഭാര്യ: പുളിങ്കുന്ന് കണ്ണാടിപുളിക്കൽ കുഞ്ഞമ്മ. സംസ്‌കാരം പിന്നീട് ചമ്പക്കര സെൻറ് ജോസഫ് പള്ളി സെമിത്തേരിയിൽ.
