കൊടുങ്ങല്ലൂർ: ക്ഷേത്രക്കുളത്തിൽ നീന്തുന്നതിനിടയിൽ കോളജ് വിദ്യാർഥി മുങ്ങിമരിച്ചു. വടക്കേക്കാട് കല്ലുങ്ങൽ പൊന്നാമ്പത്തയിൽ ഹംസയുടെ മകൻ ഫദൽ (20) ആണ് മരിച്ചത്. ശ്രീനാരായണപുരം സെന്ററിന് സമീപം ശ്രീകൃഷ്ണ ക്ഷേത്രം കുളത്തിൽ ചൊവ്വാഴ്ച വൈകീട്ട് നാലരയോടെയാണ് സംഭവം. പടിഞ്ഞാറെ വെമ്പല്ലൂർ എം.ഇ.എസ് അസ്മാബി കോളജിലെ വിദ്യാർഥിയായ ഫദലും സഹപാഠികളായ അഞ്ചുപേരുമാണ് ശ്രീകൃഷ്ണ ക്ഷേത്ര കുളത്തിൽ കുളിക്കാനെത്തിയത്. ഇതിൽ മൂന്നുപേർ പടിഞ്ഞാറേ കരയിൽ നിന്ന് കിഴക്കേ കരയിലേക്ക് നീന്തുന്നതിനിടെ ഫദൽ മുങ്ങിത്താഴുകയായിരുന്നു. കൂടെയുണ്ടായിരുന്നവർ ഒച്ചവെച്ചതിനെ തുടർന്ന് നാട്ടുകാർ തിരച്ചിൽ നടത്തിയെങ്കിലും കണ്ടെത്താനായില്ല. തുടർന്ന് മതിലകം പൊലീസും കൊടുങ്ങല്ലൂർ അഗ്നിരക്ഷ സേനയും നാട്ടുകാരും ചേർന്ന് രണ്ടു മണിക്കൂറോളം തിരച്ചിൽ നടത്തിയാണ് മൃതദേഹം കണ്ടെത്തിയത്. സംഭവത്തിന്റെ ആഘാതത്തെ തുടർന്ന് കൂടെയുണ്ടായിരുന്ന രണ്ട് വിദ്യാർഥികളെ ആശുപത്രിയിൽ പ്രവേശിപ്പിച്ചു. അസ്മാബി കോളജിലെ രണ്ടാം വർഷ മാസ് കമ്യൂണിക്കേഷൻ വിദ്യാർഥിയാണ് ഫദൽ. കോളജിനടുത്ത് താമസിച്ച് പഠിക്കുകയായിരുന്നു. ഉച്ചക്കുശേഷം ക്ലാസ് കഴിഞ്ഞ ശേഷമാണ് വിദ്യാർഥി സംഘം നീന്തി കുളിക്കാൻ കുളത്തിലെത്തിയത്. മൃതദേഹം കൊടുങ്ങല്ലൂർ മോഡേൺ ആശുപത്രിയിൽ.