നെടുങ്കണ്ടം: ഓട്ടോയും കാറും കൂട്ടിയിടിച്ച് പച്ചക്കറിക്കടയിലെ ജോലിക്കാരനായ യുവാവ് മരിച്ചു. നെടുങ്കണ്ടം ചക്കക്കാനം കുര്യന്‍പ്ലാക്കല്‍ സുനീഷ് സുരേന്ദ്രനാണ് (38) മരിച്ചത്. ഞായറാഴ്ച രാത്രി പത്തോടെ ചക്കക്കാനം കിഴക്കേക്കവല ശ്രീകൃഷ്ണസ്വാമി ക്ഷേത്രത്തിന് മുന്നിലായിരുന്നു അപകടം. പടിഞ്ഞാറേക്കവലയില്‍നിന്ന് ഓട്ടോയുമായി വരുകയായിരുന്നു സുനീഷ്. മുന്നില്‍ സഞ്ചരിച്ച കാര്‍ പെട്ടെന്ന് വേഗം കുറച്ചതിനെത്തുടര്‍ന്ന് ഓട്ടോ വലതുവശത്തേക്ക് വെട്ടിച്ചപ്പോള്‍ എതിരെ വന്ന കല്ലാര്‍ സ്വദേശിയുടെ കാര്‍ ഇടിച്ചുകയറുകയായിരുന്നു. ഓട്ടോ പൂര്‍ണമായും തകര്‍ന്നു. ഗുരുതര പരിക്കേറ്റ സുനീഷിനെ ഉടൻ ആശുപത്രിയില്‍ എത്തിച്ചെങ്കിലും മരിച്ചു. അപകടത്തിന് കാരണമായ കാര്‍ പൊലീസ് കസ്റ്റഡിയിലെടുത്തു. സുബീനയാണ് സുനീഷിന്‍റെ ഭാര്യ. മക്കള്‍: കീര്‍ത്തന, കാര്‍ത്തിക, പ്രാർഥന.
