ആലപ്പുഴ: ആലപ്പുഴ നഗരസഭ മുൻ കൗൺസിലറും സി.പി.എം ട്രേഡ് യൂനിയൻ നേതാവുമായ പവർഹൗസ് വാർഡിൽ തൈപ്പറമ്പിൽ ഒ. അഷറഫ് (55) നിര്യാതനായി. ഒന്നരമാസം മുമ്പ് കോഴിക്കോട്ട് നടന്ന കേരള മീറ്റ് മർച്ചന്റ്സ് അസോസിയേഷൻ യോഗത്തിൽ പങ്കെടുത്ത് തിരികെ ആലപ്പുഴയിൽ എത്തിയപ്പോൾ വീണ് തലക്ക് ഗുരുതര പരിക്കേറ്റിരുന്നു. വിദഗ്ധ ചികിത്സക്ക് കൊച്ചിയിലെ സ്വകാര്യ ആശുപത്രിയിലേക്ക് മാറ്റിയിരുന്നു. പിന്നീട് വീട്ടിലേക്ക് മടങ്ങിയെങ്കിലും സ്ഥിതി വഷളായതോടെ പുന്നപ്ര സാഗര സഹകരണ ആശുപത്രിയിൽ ചികിത്സയിലിരിക്കെ ഞായറാഴ്ച പുലർച്ചയാണ് അന്ത്യം. ആലപ്പുഴ നഗരസഭ ആരോഗ്യ സ്റ്റാൻഡിങ് കമ്മിറ്റി അധ്യക്ഷൻ, കേരള മീറ്റ് മർച്ചന്റ്സ് അസോസിയേഷൻ (സി.ഐ.ടി.യു) സംസ്ഥാന സെക്രട്ടറി, വ്യാപാരി വ്യവസായി സമിതി ജില്ല പ്രസിഡന്‍റ്, ലോറി ഡ്രൈവേഴ്സ് ആൻഡ്‌ ക്ലീനേഴ്സ് യൂനിയൻ (സി.ഐ.ടി.യു) ജില്ല സെക്രട്ടറി, മൊബൈൽ ടവർ എംപ്ലോയീസ് യൂനിയൻ (സി.ഐ.ടി.യു) ജില്ല സെക്രട്ടറി, സി.പി.എം ആലപ്പുഴ ഏരിയ കമ്മിറ്റിയംഗം, കൊമ്മാടി ലോക്കൽ സെക്രട്ടറി എന്നീ നിലകളിൽ പ്രവർത്തിച്ചു. ഭാര്യ: ജമീല. മകൾ: റസ്നി അഷറഫ്.
