പിളർത്തുന്ന മനുഷ്യരും പിളരുന്ന ഭൂമിയും

ഉത്തരാഖണ്ഡിൽ ചമോലി ജില്ലയിലെ ജോഷിമഠിൽ​ വൻതോതിൽ ഭൂമിയും കെട്ടിടങ്ങളും വിണ്ടുകീറുകയും മണ്ണിടിയുകയും ചെയ്യുന്ന പ്രതിഭാസം പ്രദേശവാസികളെ മാത്രമല്ല, കേന്ദ്ര-സംസ്ഥാന ഭരണകൂടങ്ങളെത്തന്നെ ആശങ്കയിലാഴ്ത്തിയിരിക്കുന്നു. ബദ്​രിനാഥ്​, ഹേമകുണ്ഡ്​ സാഹിബ്​ എന്നീ ഹൈന്ദവ തീർഥാടന കേന്ദ്രങ്ങളിലേക്കുള്ള വഴിയിൽ ദൃശ്യമായ ഈ പ്രതിഭാസത്തിൽ 4500 കെട്ടിടങ്ങളിൽ 610 എണ്ണം വലിയ വിള്ളലുകൾ വീണ്​ വാസയോഗ്യമല്ലാതായി. ജോഷിമഠ്​ മണ്ണിടിച്ചിൽ-ഭൂമിതാഴൽ പ്രദേശമായി പ്രഖ്യാപിച്ച്​ 600 കുടുംബങ്ങളെ മാറ്റിപ്പാർപ്പിച്ചിരിക്കുകയാണ്​. പ്രശ്നപരിഹാരത്തിനായി പ്രധാനമന്ത്രിയുടെ ഓഫിസ്​ (പി.എം.ഒ) നേരിട്ട് ഉന്നതതല യോഗം വിളിച്ച്​ വിദഗ്​ധസമിതി​യെ അന്വേഷണത്തിനു ചുമതലപ്പെടുത്തിയിരിക്കുന്നു​. അപ്പോഴും ജില്ല കലക്ടർ അടക്കമുള്ള ഉന്നത ഉദ്യോഗസ്ഥസംഘം ദുരന്തകാരണമറിയി​ല്ലെന്ന് കൈമലർത്തുകയാണ്​. ഊർജോൽപാദന കമ്പനികൾക്കായി മണ്ണും വിഭവങ്ങളും ചൂഷണം ചെയ്യുന്നതാണ്​ പ്രകൃതിയുടെ പ്രകോപനത്തിന് കാരണമെന്ന് ജനം ചൂണ്ടിക്കാട്ടിയിട്ടും കണ്ടില്ലെന്നു നടിക്കുകയാണ്​ അധികൃതർ. പദ്ധതി നിർമാണങ്ങളുടെ ഭാഗമായി നടത്തുന്ന വൻ സ്​ഫോടനങ്ങളാണ്​ വിള്ളലിനു പിന്നി​ലെന്ന്​ ചൂണ്ടിക്കാട്ടി അവർ ഒരുമാസംമുമ്പ് മുഖ്യമന്ത്രിക്കു പരാതി നൽകിയിട്ടും അവർ കണ്ണുതുറന്നില്ല.

ജോഷിമഠിൽ കെട്ടിടങ്ങളും ഭൂമിയുമൊന്നും പെട്ടെന്നൊരുനാൾ പൊട്ടിപ്പിളർന്നതല്ല. പരിസ്ഥിതിലോലമായ ഹിമാലയൻ ആവാസവ്യവസ്​ഥയിൽ വൻതോതിലുള്ള കടന്നുകയറ്റമാണ്​ ഉത്തരാഖണ്ഡ്​ മലനിരകളിൽ നടന്നുവരുന്നതെന്നതിന്​ ചരിത്രം സാക്ഷിയാണ്​. അരനൂറ്റാണ്ടുമുമ്പ്​ ഭൂമിതാഴ്ച അനുഭവപ്പെട്ടതിനെ തുടർന്ന്​ അന്നത്തെ ഗഢ്​വാൾ കലക്ടർ എം.സി. മിശ്രയുടെ നേതൃത്വത്തിൽ ഒരു പതിനെട്ടംഗ സമിതിയെ സംഭവം പഠിച്ച്​ റിപ്പോർട്ട്​ സമർപ്പിക്കാൻ ഗവൺമെന്‍റ്​ ചുമതലപ്പെടുത്തിയിരുന്നു. ​ പുരാതനകാലത്തും മണ്ണിടിച്ചിലുണ്ടായ, ഉറച്ച പാറയില്ലാത്ത, മണ്ണുറഞ്ഞ പ്രദേശമാണ് ജോഷിമഠെന്നും അവിടെ വികസനപ്രവർത്തനങ്ങൾ നടന്നാൽ കെട്ടിടങ്ങളും ഭൂമിയും മുങ്ങുന്നത്​ തുടരു​മെന്നും അതിനാൽ ഭാരിച്ച നിർമാണ പ്രവർത്തനങ്ങൾ നിരോധിക്കണമെന്നുമായിരുന്നു റിപ്പോർട്ടിലെ പ്രധാന നിർദേശം. ഭൂകമ്പസാധ്യത മേഖലയായതിനാൽ കൃത്യമായ ആസൂത്രണത്തോടുകൂടിയ നിയന്ത്രിത നിർമാണ പ്രവർത്തനങ്ങൾ വേണം നടത്താനെന്നും സമിതി പറഞ്ഞതാണ്. ഉത്തരാഖണ്ഡിൽ ഇടക്കിടെ പ്രകൃതിദുരന്തങ്ങളുണ്ടാകുമ്പോഴൊക്കെ ഇക്കാര്യം വിദഗ്​ധർ കൂടക്കൂടെ അധികൃതരെ ഉണർത്തിക്കൊണ്ടുമിരുന്നു​. എന്നിട്ടും ബഹുനില കെട്ടിടങ്ങൾ, ഏഷ്യയിലെ ഏറ്റവും നീളം കൂടിയതും വലുതുമായ റോപ്​വേ, ചാർധാം പദ്ധതിയുടെ ഭാഗമായുള്ള പുതിയ റോഡുകൾ, 420 മെഗാവാട്ടിന്‍റെ വിഷ്ണുപ്രയാഗ്​ ഹൈഡ്രോപവർ ​​പദ്ധതി, ​നാഷനൽ തെർമൽ പവർ കോർപറേഷൻ (എൻ.ടി.പി.സി) നിർമിക്കുന്ന 520 മെഗാവാട്ടിന്‍റെ തപോവൻ വിഷ്ണുഗഢ്​ ഹൈഡ്രോ പവർ പ്രോജക്ട്​ തുടങ്ങിയ വൻകിട പദ്ധതികൾ ഒന്നൊന്നായി വന്നുകൊണ്ടിരുന്നു. ഭൂമി നെടുകെ പിളർത്തിയാണ്​ ഇതെല്ലാം നിർമിച്ചെടുക്കുന്നത്​. വികസന, ധനമോഹം മൂത്ത്​ വിദഗ്​ധസമിതി നിർദേശങ്ങളെല്ലാം വലിച്ചെറിഞ്ഞ്​ വഴിയെപോകുന്ന ദുരന്തങ്ങളെ വലിച്ചുകയറ്റി ജനത്തെ വഴിയാധാരമാക്കുകയാണ്​ സംസ്ഥാനത്തെ ബി.ജെ.പി സർക്കാർ ചെയ്തത്​. ജനുവരി ഏഴിനു ശനിയാഴ്ച ജ്യോതിഷ് പീഠം ശങ്കരാചാര്യ അവിമുക്തേശ്വരാനന്ദ സരസ്വതി, ആയിരങ്ങളെ അപകടത്തിൽപെടുത്തുന്ന ദുരന്തത്തിൽനിന്ന് രക്ഷാമാർഗം ആവശ്യ​പ്പെട്ട്​ സുപ്രീംകോടതിയെ സമീപിച്ചതോടെയാണ്​ ധാമി സർക്കാർ സടകുടഞ്ഞെഴുന്നേറ്റത്​. എന്നാൽ, ഇപ്പോൾ തല്ലിപ്പടക്കുന്ന വിദഗ്​ധസമിതിയും കാര്യമായ പ്രയോജനം ചെയ്യാൻ വഴിയില്ലെന്നാണ്​ ഇത്രയും കാലം സർക്കാർ പുല്ലുപോലെ തള്ളിയ റിപ്പോർട്ടുകൾ തെളിയിക്കുന്നത്​.

ഹിന്ദു തീർഥാടന കേന്ദ്രങ്ങൾ നിരവധിയുള്ള ഉത്തരാഖണ്ഡിന്​ ദേവഭൂമി എ​ന്നും പേരുണ്ട്​. അത്​ കൂടുതൽ ഉയർത്തിപ്പിടിക്കുന്നവരാണ്​ ബി.ജെ.പിക്കാർ. എന്നാൽ, ദേവഭൂമിയെ നെടുകെ പിളർത്തി വികസന പദ്ധതികളൊരുക്കുന്നതിലോ അത്​ മനുഷ്യർക്ക്​ ദുരിതം വിതക്കുന്നതിലോ അവർക്കു വിഷമമൊന്നുമില്ല. മനുഷ്യർക്കിടയിൽ പിളർപ്പുണ്ടാക്കാൻ അത്തരം പുണ്യനാമങ്ങൾ ഉപയോഗിക്കാനാണ്​ അവർക്കു താൽപര്യം. ജോഷിമഠിലെ പൊട്ടിപ്പിളരലിനുമുമ്പ്​ ഉത്തരാഖണ്ഡ്​ മറ്റൊരു കുടിയിറക്കിന്‍റെ തിരക്കിലായിരുന്നു. ഹൽദ്വാനി ബൻഫൂൽപുരയിലെ അഞ്ചു വാർഡുകളിൽ അരനൂറ്റാണ്ടിലേറെക്കാലമായി കൃത്യമായ രേഖയും പ്രമാണവുമായി ജീവിച്ചുപോകുന്ന 4000 കുടുംബങ്ങളിലെ അരലക്ഷം പേരെയാണ്​ രായ്ക്കുരാമാനം കുടിയൊഴിപ്പിക്കാൻ ഉത്തരാഖണ്ഡ്​ ഹൈകോടതി ഉത്തരവിട്ടത്​. അരനൂറ്റാണ്ടുമുമ്പ് രേഖസഹിതം കൈവശപ്പെടുത്തി ഇപ്പോഴും നികുതിയും മറ്റു ധനബാധ്യതകളും ഒടുക്കിവരുന്ന താമസക്കാരോടാണ്,​ റവന്യൂ ഭൂമിയോ റെയിൽവേ ഭൂമിയോ എന്ന് ഇനിയും തിട്ടമായിട്ടില്ലാത്ത സ്ഥലത്തുനിന്നു ഇറങ്ങാൻ പറഞ്ഞത്​. അതിനു പിന്തുണയുമായി ‘ദേവഭൂമിയിൽ ഭൂജിഹാദ്’​, ‘രണ്ടാം ശാഹീൻബാഗ്​’ എ​ന്നൊക്കെ ചാപ്പയടിച്ച്​ ഇറങ്ങുകയായിരുന്നു ഹിന്ദുത്വകക്ഷികളും അവരുടെ വരുതിയിലുള്ള മുഖ്യധാര മാധ്യമങ്ങളും. അവിടെയും സർക്കാർ ജനത്തിന്‍റെ രക്ഷക്കെത്തിയില്ല എന്നു മാത്രമല്ല, ഹൈകോടതി വിധിയുടെ മറപറ്റി വംശീയാ​വേശത്തോടെ അവരെ വഴിയാധാരമാക്കാൻ മുന്നിട്ടിറങ്ങുകയും ചെയ്തു. അങ്ങനെ മണ്ണിനെയും മനുഷ്യരെയും ചവിട്ടിമെതിച്ചുള്ള വികസനമോഹങ്ങൾ നമ്മെ എവിടെ കൊണ്ടെത്തിക്കും എന്ന ചോദ്യത്തിനുള്ള ഉത്തരമാണ്​ ഉത്തരാഖണ്ഡ്​.