ഗോൾനേട്ടത്തിൽ ഛേത്രി മെസ്സിക്കൊപ്പം; മുമ്പിൽ റൊണാൾഡോ മാത്രം

നിലവില്‍ ഫുട്‌ബാള്‍ രംഗത്ത് സജീവമായ ഏറ്റവുമധികം ഗോള്‍ നേടിയ താരങ്ങളുടെ പട്ടികയില്‍ ഛേത്രി രണ്ടാം സ്ഥാനത്തേക്ക്​ കയറി

ന്യൂഡൽഹി: സാഫ്​ ചാമ്പ്യൻഷിപ്പ്​ ഫൈനലിൽ സ്​കോർ ചെയ്​ത ഇന്ത്യൻ ഫുട്​ബാൾ ടീം നായകൻ സുനിൽ ഛേത്രി അന്താരാഷ്​ട്ര ഗോൾവേട്ടക്കാരുടെ പട്ടികയിൽ അർജന്‍റീന സൂപ്പർ താരം ലയണൽ മെസ്സിക്കൊപ്പമെത്തി. ഛേത്രി തന്‍റെ 80ാമത്തെ അന്താരാഷ്​ട്ര ഗോളാണ്​ നേപ്പാളിനെതിരെ നേടിയത്​. ക്രിസ്റ്റ്യാനോ റൊണാൾഡോ (115) ഒന്നാം സ്​ഥാനം അലങ്കരിക്കുന്ന പട്ടികയിൽ അഞ്ചാമതാണ്​ ഛേത്രിയിപ്പോൾ.

നിലവില്‍ ഫുട്‌ബാള്‍ രംഗത്ത് സജീവമായ ഏറ്റവുമധികം ഗോള്‍ നേടിയ താരങ്ങളുടെ പട്ടികയില്‍ ഛേത്രി രണ്ടാം സ്ഥാനത്തേക്ക്​ കയറി. റൊണാള്‍ഡോ മാത്രമാണ് ഛേത്രിക്ക് മുന്നിലുള്ളത്.

155 മത്സരങ്ങളില്‍ നിന്നാണ് മെസ്സി 80 ഗോള്‍ നേടിയത്. ഇന്ത്യന്‍ നായകന്‍ ഈ റെക്കോര്‍ഡിനൊപ്പമെത്താന്‍ വേണ്ടിവന്നത് 124 മത്സരങ്ങള്‍ മാത്രം. കഴിഞ്ഞ ദിവസം മാലദ്വീപിനെതിരായ സെമിയിൽ ഇരട്ടഗോൾ നേടിയ ഛേത്രി ബ്രസീലിയൻ ഇതിഹാസം പെലെയെ മറികടന്നിരുന്നു.

ഫൈനലിൽ നേപ്പാളിനെ എതിരില്ലാത്ത മൂന്നു​ ഗോളുകൾക്ക്​ തകർത്താണ്​ ഇന്ത്യ സാഫ്​ കപ്പിൽ എട്ടാം തവണ മുത്തമിട്ടത്​. ഛേത്രിയെ കൂടാതെ സുരേഷ്​ സിങ്ങും മലയളാളി താരം സഹൽ അബ്​ദുൽ സമദുമാണ്​ ഇന്ത്യയുടെ മറ്റ്​ സ്​കോറർമാർ.

ദ​ക്ഷി​ണേ​ഷ്യ​ൻ രാ​ജ്യ​ങ്ങ​ളുടെ ടൂർണമെന്‍റിന്‍റെ 13 എഡിഷനുകളിൽ 12ലും ഇന്ത്യ ഫൈനൽ ബെർത്ത്​ സ്വന്തമാക്കിയിരുന്നു. ​കോച്ച്​ ഐകർ സ്റ്റിമാകിന്‍റെ കീഴിൽ ഇന്ത്യ നേടുന്ന ആദ്യ കിരീടമാണിത്​. സ്റ്റിമാകിന്​ കീഴിൽ ടീം വിജയങ്ങൾ നേടുന്നില്ലെന്ന വിമർശനങ്ങൾക്കുള്ള ചുട്ട മറുപടി കൂടിയാണ്​ വിജയം. ജിരി പെസേകിനും (1993) സ്റ്റീഫൻ കോൺസ്റ്റൻ​ൈന്‍റനും (2015) ശേഷം ഇന്ത്യക്ക്​ കിരീടം നേടിക്കൊടുത്ത മുന്നാമത്തെ വിദേശ കോച്ചായി സ്റ്റിമാക്​.