സൗരവ്​ ഗാംഗുലിയുടെ ​കുടുംബാംഗങ്ങൾക്ക്  കോവിഡ്​

കൊൽക്കത്ത: മുൻ ഇന്ത്യൻ നായകനും ബി.സി.സി.ഐ പ്രസിഡൻറുമായ സൗരവ്​ ഗാംഗുലിയുടെ കുടുംബാംഗങ്ങൾക്ക് കോവിഡ്​. സൗരവിൻെറ മൂത്ത സഹോദരനും ബംഗാൾ ക്രിക്കറ്റ്​ അസോസിയേഷൻ സെക്രട്ടറിയുമായ സ്​നേഹാഷിഷ്​ ഗാംഗുലിക്കും ഭാര്യക്കുമാണ്​ രോഗബാധ സ്ഥിരീകരിച്ചത്​. പശ്​ചിമബംഗാൾ ആരോഗ്യവകുപ്പാണ്​ ഇക്കാര്യം അറിയിച്ചത്​.

സ്​നേഹാഷിഷിൻെറ ഭാര്യയുടെ മാതാവിനും പിതാവിനുമാണ്​ ആദ്യം രോഗബാധ കണ്ടെത്തിയത്​​. നാല്​ പേരും കോവിഡ്​ ലക്ഷണങ്ങളോടെ വീട്ടിൽ കഴിയുകയായിരുന്നു. രോഗം സ്ഥിരീകരിച്ചതിനെ തുടർന്ന്​ എല്ലാവരെയും സ്വകാര്യ നഴ്​സിങ്​ ഹോമിലേക്ക്​ മാറ്റി. എന്നാൽ, ഇവരുടെ ആരോഗ്യസ്ഥിതിയെ കുറിച്ചുള്ള കൂടുതൽ വിവരങ്ങൾ പുറത്ത്​ വന്നിട്ടില്ല. 

നേരത്തെ കോവിഡിന്​ മരുന്ന്​ കണ്ടെത്തുകയാണെങ്കിൽ ക്രിക്കറ്റ്​ മൽസരങ്ങൾ പുനഃരാരംഭിക്കാമെന്ന്​ ഗാംഗുലി പറഞ്ഞിരുന്നു. അടുത്ത ആറ്​ അല്ലെങ്കിൽ ഏഴ്​ മാസങ്ങൾക്കുള്ളിൽ കോവിഡിന്​ മരുന്ന്​ കണ്ടെത്തുമെന്നാണ്​ പ്രതീക്ഷ. അങ്ങനെയെങ്കിൽ കാര്യങ്ങൾ പഴയ നിലയിലെത്തുമെന്നായിരുന്നു ഗാംഗുലിയുടെ പരാമർശം.