മറ്റു ബാറ്റ്​സ്മാ​ന്മാരുടെ പരാജയം കോഹ്​ലിയിൽ സമ്മർദമ​ുണ്ടാക്കുന്നു -ഇംഗ്ലണ്ട്​​ കോച്ച്​

ബർമിങ്​ഹാം: വിരാട്​ കോഹ്​ലി തകർപ്പൻ ഫോമിലാണെങ്കിലും മറ്റു ബാറ്റ്​സ്​മാന്മാരുടെ പരാജയം ഇന്ത്യൻ ക്യാപ്​റ്റ​​​െൻറ മേൽ സമ്മർദമ​ുണ്ടാക്കുന്നതായും അത്​ മുതലെടുക്കാനാണ്​ ഇംഗ്ലണ്ടി​​​െൻറ ശ്രമമെന്നും കോച്ച്​ ട്രെവർ ബൈലിസ്​. മറ്റു ബാറ്റ്​സ്​മാന്മാരെ സ്​കോർ ചെയ്യാനനുവദിക്കാതെ തളച്ചിടുന്നതിലും അതുവഴി കോഹ്​ലിയുടെ മേൽ സമ്മർദമുണ്ടാക്കുന്നതിലുമാണ്​ ഇംഗ്ലീഷ്​ ബൗളർമാർ ശ്രദ്ധിക്കുന്നത്​. ആദ്യ ടെസ്​റ്റി​​​െൻറ ഒന്നാം ഇന്നിങ്​സിൽ ഇത്​ വിജയിച്ചില്ലെങ്കിലും രണ്ടാം ഇന്നിങ്​സിൽ നിർണായകഘട്ടത്തിൽ കോഹ്​ലിയുടെ പുറത്താവലിന്​ കാരണം ഇതാണെന്നും ബൈലിസ്​ കൂട്ടിച്ചേർത്തു. 

കോഹ്​ലിയെ ലോകത്തെ മികച്ച ബാറ്റ്​സ്​മാൻ എന്ന്​ വിശേഷിപ്പിക്കാനാവില്ലെങ്കിലും അതിനടുത്തെത്തിയിട്ടുണ്ടെന്ന്​ ഇംഗ്ലണ്ട്​ കോച്ച്​ അഭിപ്രായപ്പെട്ടു. ആദ്യ ടെസ്​റ്റിലെ കോഹ്​ലി ഇന്നിങ്​സുകൾ ഉന്നത നിലവാരമുള്ളതായിരുന്നുവെന്നും അദ്ദേഹം പറഞ്ഞു. എഡ്​ജ്​ബാസ്​റ്റൺ ടെസ്​റ്റിൽ കോഹ്​ലി ഒഴികെ ഇരു ടീമിലെയും ബാറ്റ്​സ്​​മാ​ന്മാരെല്ലാം റൺ സ്​കോർ ചെയ്യാനും ക്രീസിൽ തുടരാനും ഏറെ ബുദ്ധിമുട്ടിയതായി ബൈലിസ്​ പറഞ്ഞു. കോഹ്​ലി തന്നെയും ഇന്നിങ്​സി​​​െൻറ തുടക്കത്തിൽ പ്രയാസപ്പെട്ട ​കാര്യം അദ്ദേഹം ചൂണ്ടിക്കാട്ടി. 

ഇന്ത്യ മികച്ച ടീമാണെന്നും ആദ്യ ടെസ്​റ്റിലെ പരാജയത്തിൽനിന്ന്​ കരകയറാൻ അവർ എല്ലാ അടവും പയറ്റുമെന്നും അവ നേരിടാൻ ഇംഗ്ലണ്ട്​ ഒരുക്കമാണെന്നും ബൈലിസ്​ പറഞ്ഞു. ഒമ്പതിന്​ ലോർഡ്​സിലാണ്​ അഞ്ച്​ മത്സര പരമ്പരയിലെ രണ്ടാം ടെസ്​റ്റ്​ തുടങ്ങുക.