സൗദിക്കെതിരെ ജർമനിക്ക്​ കഷ്​ടിച്ച്​ ജയം

ലെവർകൂസൻ: കിരീടം നിലനിർത്താനായി റഷ്യയിലേക്ക്​ പറക്കുംമുമ്പ്​ ലോകചാമ്പ്യന്മാർക്ക്​ ജയിച്ചെന്ന്​ ആശ്വസിക്കാം. പക്ഷേ, 2014 ബ്രസീൽ ആവർത്തിക്കാനുള്ള മരുന്നൊന്നും ലോയ്​വി​​െൻറ പടയാളികളിൽനിന്നു ഇതുവരെ പുറത്തുവന്നിട്ടില്ല. ജയമറിയാതെ കടന്നുപോയ അഞ്ചുമത്സരങ്ങൾക്കൊടുവിൽ ജർമനിക്ക്​ സൗദിക്കെതിരെ ആശ്വാസജയം. ലെവർകൂസനിൽ നടന്ന സന്നാഹ മത്സരത്തിൽ  2-1നായിരുന്നു ലോകചാമ്പ്യന്മാരുടെ ജയം. കളിയുടെ എട്ടാം മിനിറ്റിൽ തിമോ വെർനറുടെ മനോഹര ഗോളിൽ അവർ ലീഡ്​ നേടി. മാർകോ റ്യുസ്​ വെച്ചുനീട്ടിയ ക്രോസ്​ വെർനർ അനായാസം വലയിലെത്തിക്കുകയായിരുന്നു. 

ആദ്യ പകുതി അവസാനിക്കും മു​േമ്പ സെൽഫ്​ഗോളി​​െൻറ രൂപത്തിൽ രണ്ടാമത്തേതും പിറന്നു. വെർനറിൽനിന്നു മ്യൂളറിലേക്കുള്ള ക്രോസ്​ വീണുകിടന്നു തടയുന്നതിനിടെ ഉമർ ഹൗസാവിയുടെ കാലിൽതട്ടിയാണ്​ സെൽഫ്​ ഗോൾ പിറന്നത്​. 2-0ത്തിന്​ ലീഡ്​ പിടിച്ച ആത്മവിശ്വാസവുമായി കളംവിട്ട ജർമനിയുടെ പ്രതിരോധപ്പിഴവുകൾ തുറന്നു കാണിക്കുന്നതായിരുന്നു രണ്ടാം പകുതിയിൽ സൗദിയുടെ പ്രകടനങ്ങൾ. പ്രതിരോധവും മുന്നേറ്റവും മാറ്റിപ്പണിത ​ജർമൻനിരയിൽ അവർ പിഴവുകൾ കണ്ടെത്തി. എങ്കിലും, ഗോൾ പിറക്കാൻ 84ാം മിനിറ്റ്​ വരെ കാത്തിരിക്കേണ്ടി വന്നു. മാറ്റ്​ ഹുമ്മൽസി​​െൻറ ഫൗളിന്​ ലഭിച്ച പെനാൽറ്റി കിക്ക്​ മുഹമ്മദ്​ അൽ സഹ്​ലാവി എ​ടുത്തെങ്കിലും ഗോളി മാനുവൽ നോയർ തടഞ്ഞിട്ടു. പ​േക്ഷ, റീബൗണ്ട്​ ചെയ്​ത പന്ത്​ ചാടിവീണ സൗദി താരം തയ്​സിർ ജാസിം വലയിലാക്കി മറുപടി ഗോൾ കുറിച്ചു. 

2002 ലോകകപ്പ്​ ഗ്രൂപ്​ റൗണ്ടിൽ തങ്ങളെ 8-0ത്തിന്​ തകർത്ത ജർമനിക്കെതിരെ സൗദിക്ക്​ തലയുയർത്തി മടങ്ങാൻ ​കരുത്ത്​ നൽകുന്ന വീരോചിത തോൽവി. നവംബറിനു ശേഷം ഒരുകളിയും ജയിക്കാത്ത ജർമനിക്ക്​ ആശ്വാസമാണ്​ ഇൗ ഫലം. മൂന്ന്​ സമനിലയും രണ്ട്​ തോൽവിയുമായി പൊറുതിമുട്ടിയ ലോയ്​വിന്​ നെഞ്ചുവിരിച്ച്​ റഷ്യയിൽ വിമാനമിറങ്ങാൻ കരുത്ത്​ നൽകുന്ന ജയം. മറ്റു മത്സരങ്ങളിൽ സ്വിറ്റ്​സർലൻഡ്​ 2-0ത്തിന്​ ജപ്പാനെയും ക്രൊയേഷ്യ 2-1ന്​ സെനഗലിനെയും തോൽപിച്ചു. പോളണ്ട്​-ചിലി മത്സരം 2-2ന്​ സമനിലയിൽ പിരിഞ്ഞു.