മുതിർന്നവരിൽ ശാരീരികക്ഷമതയും ആരോഗ്യവും നിലനിർത്താൻ നല്ല ഭക്ഷണവും ആവശ്യത്തിന് ഉറക്കവും എന്ന​പോലെ മറ്റൊരു പ്രധാന ഘടകമാണ് നിത്യവ്യായാമം

ജനനം മുതൽ ജീവിതാന്ത്യംവരെ എല്ലാവർക്കും വേണ്ടതാണ് വ്യായാമം.

ഹൃദ്രോഗം, സ്ട്രോക്, പ്രമേഹം, ചിലതരം അർബുദങ്ങൾ തുടങ്ങി പലതരം ജീവിതശൈലീ രോഗങ്ങളെ തടയുന്നതിനും നിയന്ത്രിക്കുന്നതിനും വ്യായാമം സഹായിക്കും.

വ്യായാമം ചെയ്യുമ്പോൾ നമ്മുടെ തലച്ചോറിൽ ഉൽപാദിപ്പിക്കപ്പെടുന്ന ‘എൻ​ഡോഫിനുകൾ’എന്ന ഹോർമോണുകൾ ഉത്കണ്ഠ, മാനസിക സമ്മർദം, വിശപ്പ് എന്നിവ കുറക്കുകയും മനസ്സിന് സന്തോഷം കൂടാനും ഒപ്പം ശരീരഭാരം നിയന്ത്രിക്കാനും സഹായിക്കുകയും ചെയ്യുന്നു.

നിത്യവ്യായാമം നമ്മുടെ ശാരീരികക്ഷമത കൂട്ടുന്നു. പേശികൾക്കും എല്ലുകൾക്കും ശക്തിയും ശരീരത്തിന് ബാലൻസും പ്രദാനം ചെയ്യുന്നു.

മുതിർന്നവർക്ക് വ്യായാമത്തിന് ഏറ്റവും അനുയോജ്യമായ സമയം സൂര്യോദയശേഷം വെയിലുറക്കുന്നതിന് മുമ്പാണ്.

ദിവസേന കുറഞ്ഞത് 30 മിനിറ്റെങ്കിലും വ്യായാമത്തിലേർപ്പെടണം. ആഴ്ചയിൽ 5 ദിവസം തുടരണമെന്ന് പഠനം.

വ്യായാമം തുടങ്ങുന്നതിന് അരമണിക്കൂർ മുമ്പ് ലഘുഭക്ഷണം കഴിക്കുന്നത് നല്ലതാണ്. ഫലവർഗങ്ങളോ പാലോ മുട്ടയുടെ വെള്ളയോ ഒക്കെയാകാം.

പ്രമേഹരോഗമുള്ളവരാണെങ്കിൽ നടക്കുന്നതിന് മുമ്പ് രക്തത്തിലെ പഞ്ചസാരയുടെ അളവ് 90mg/dcൽ കുറയരുത്.

മുതിർന്നവർ കഠിനമായ വ്യായാമ രീതികളിൽനിന്ന് വിട്ടുനിൽക്കുക. മിതമായ വ്യായാമ രീതികളായ നടത്തം, ചെറിയ പടികൾ കയറുക, പൂന്തോട്ട പരിപാലനം, യോഗ, സ്ട്രെച്ചിങ് വ്യായാമമുറകൾ, ശരീരത്തിന്റെ ബാലൻസ് കൂടുന്നതിനുപകരിക്കുന്ന വ്യായാമങ്ങൾ മുതലായവ ശീലിക്കണം.

പുറത്തുപോയി വ്യായാമം ചെയ്യാൻ കഴിയാത്തവർ പോലും എപ്പോഴും ഇരിക്കുന്നതും കിടക്കുന്നതും ഒഴിവാക്കണം. പകരം കഴിയുന്നതുപോലെ എന്തെങ്കിലും ചെയ്യുക.

വ്യായാമത്തിലേർപ്പെടുമ്പോൾ ശരീരത്തിലെവിടെയെങ്കിലും കഠിനമായ വേദന, ഹൃദയമിടിപ്പ് വളരെ കൂടുക, കണ്ണിൽ ഇരുട്ട് കയറുക, ശ്വാസതടസ്സം, നെഞ്ച് വേദന, ഓക്കാനം, വല്ലാത്ത വിയർപ്പ് മുതലായ ലക്ഷണങ്ങൾ അനുഭ​വപ്പെട്ടാൽ വ്യായാമം നിർത്തി വൈദ്യസഹായം തേടുക.

വ്യായാമത്തിനു മുമ്പ് രോഗങ്ങളുള്ളവർ ചികിത്സിക്കുന്ന ഡോക്ടറുടെ ഉപദേശം തേടിയിരിക്കണം