കിയവ്​ വളയാനൊരുങ്ങി റഷ്യ; നഗരത്തിൽ വീണ്ടും സ്​ഫോടനങ്ങൾ

കിയവ്​: യുക്രെയ്​ൻ തലസ്ഥാനമായ കിയവ്​ വളയാനുള്ള നടപടികളുമായി റഷ്യ അതിവേഗം മുന്നോട്ട്​. കിയവ്​ നഗരത്തിന്​ 32 കിലോ മീറ്റർ അകലെ റഷ്യൻ സൈന്യം എത്തിയെന്നാണ്​ റിപ്പോർട്ട്​. നഗരത്തിൽ വീണ്ടും സ്​ഫോടന ശബ്​ദം കേട്ടെന്ന്​ സി.എൻ.എൻ റിപ്പോർട്ട്​ ചെയ്തു. കിയവി​ന്​ നേരെ റഷ്യ ബാലിസ്റ്റിക്​ മിസൈൽ പ്രയോഗിച്ചുവെന്ന റിപ്പോർട്ടുകളും പുറത്ത്​ വരുന്നുണ്ട്​. അതേസമയം, റഷ്യ പ്രയോഗിച്ച മിസൈലുകളിലൊന്ന്​ ആന്‍ററി മിസൈൽ സിസ്റ്റം ഷൂട്ടിങ്​ ഉപയോഗിച്ച്​ തകർത്തുവെന്നും യുക്രെയ്​ൻ അറിയിച്ചു. രാജ്യത്തിന്‍റെ ഇന്‍റീരിയർ മിനിസ്റ്റർ യെവാൻ യെനിനാണ്​ ഇക്കാര്യം അറിയിച്ചത്​.

30ഓളം റഷ്യൻ ടാങ്കുകളും ഏഴ്​ എയർക്രാഫ്​റ്റുകളും ആറ്​ ഹെലികോപ്​ടറുകളും തകർത്തുവെന്നും യുക്രെയ്​ൻ അവകാശപ്പെട്ടു. യുക്രെയ്​ൻ നഗരങ്ങളായ സപ്പോരിജയിലും ഒഡേസയിലും ഇന്ന്​ വ്യോമാക്രമണമുണ്ടായി. രണ്ടാം ദിവനവും റഷ്യയുടെ കനത്ത ആക്രമണമാണ്​ യുക്രെയ്​ന്​ നേരിടേണ്ടി വരുന്നത്​. അതേസമയം, റഷ്യക്ക്​ മേൽ പുതിയ ഉപരോധം ഏർപ്പെടുത്താൻ യുറോപ്യൻ യൂനിയൻ തീരുമാനിച്ചു.

റഷ്യൻ പ്രസിഡന്‍റ്​ വ്ലാദമിർ പുടിനുമായി ഫ്രഞ്ച്​ പ്രസിഡന്‍റ്​ ഇമാനുവൽ മാക്രോൺ ഫോണിൽ സംസാരിച്ചു. യുദ്ധം ശക്​തമായിരിക്കെ നാറ്റോയുടെ നിർണായക യോഗവും ഇന്ന്​ നടക്കും. യുക്രെയ്​ന്​ സമീപത്ത്​ കൂടിയുള്ള യാത്രയിലെ അപകടം മുന്നിൽകണ്ട്​ വിവിധ വിമാന കമ്പനികൾ വ്യോമപാത മാറ്റാനുള്ള നീക്കം തുടങ്ങി. യുക്രെയ്​നിൽ കുടുങ്ങിയ പൗരൻമാരെ നാട്ടിലെത്തിക്കുന്നതിനുള്ള ശ്രമങ്ങൾ ഇന്ത്യ വീണ്ടും ഊർജിതമാക്കി. യുക്രെയ്​നിന്‍റെ അയൽ രാജ്യങ്ങൾ വഴി ഇന്ത്യക്കാരെ എത്തിക്കുന്നതിനാണ്​ ശ്രമം നടക്കുന്നത്​.