മനാമ: ഗുരുദേവ സോഷ്യല് സൊസൈറ്റിയുടെ ക്ഷണം സ്വീകരിച്ച് ബഹ്റൈനില് എത്തിയ ചങ്ങനാശ്ശേരി അതിരൂപത ആര്ച്ച് ബിഷപ് മാര് ജോസഫ് പെരുന്തോട്ടം, ശ്രീനാരായണ ധര്മസംഘം ട്രസ്റ്റ് പ്രസിഡന്റ് സച്ചിദാനന്ദ സ്വാമികള്, ശ്രീനാരായണ ധര്മസംഘം ട്രസ്റ്റ് പ്രതിനിധി സ്വാമി ഋതംബരാനന്ദ എന്നിവര് പ്രവാസി ഭാരതീയ സമ്മാന് ജേതാവ് കെ.ജി. ബാബുരാജനോടൊപ്പം കേരള കാത്തലിക് അസോസിയേഷന് സന്ദര്ശിച്ചു.
2024 നവംബര് 30ന് റോമില് ശ്രീനാരായണ ധര്മ സംഘം ട്രസ്റ്റ് സംഘടിപ്പിക്കുന്ന ലോക സര്വമത സമ്മേളനത്തിന്റെ പ്രതീകമായി കെ.സി.എയില് ഇങ്ങനെയൊരു വേദിയൊരുക്കന് തയാറായത് മാതൃകാപരമാണെന്ന് വിശിഷ്ടാതിഥികള് അഭിപ്രായപ്പെട്ടു. മത നേതാക്കളെ കെ.സി.എ പ്രസിഡന്റ് ജെയിംസ് ജോണിന്റെ നേതൃത്വത്തിലുള്ള ഭരണസമിതി അംഗങ്ങളും സുഹൃത്തുക്കളും സ്വീകരിച്ചു. ജനറല് സെക്രട്ടറി വിനു ക്രിസ്റ്റി സ്വാഗതം പറഞ്ഞു.
നവംബര് 30ന് വത്തിക്കാനില് നടക്കുന്ന മത സൗഹാര്ദ സമ്മേളനത്തിന് ചങ്ങനാശ്ശേരി അതിരൂപത ആര്ച്ച് ബിഷപ് മാര് ജോസഫ് പെരുന്തോട്ടം ആശംസകങ്ങള് നേർന്നു. എല്ലാ മതങ്ങളുടെയും സാരം ഒന്നാണെന്നും എല്ലാ മനുഷ്യരും സഹവര്ത്തിത്തത്തോടെ ജീവിക്കണമെന്നും ശ്രീനാരായണ ധര്മസംഘം ട്രസ്റ്റ് പ്രസിഡന്റ് ബ്രഹ്മശ്രീ സച്ചിദാനന്ദ സ്വാമികള് പറഞ്ഞു.
റോമില് നടക്കുന്ന ലോക സര്വമത സമ്മേളനത്തില് കെ.സി.എ പ്രതിനിധികള് പങ്കെടുക്കുമെന്ന് അറിയിച്ചതില് കെ.ജി. ബാബുരാജന് സന്തോഷം പ്രകടിപ്പിച്ചു. കെ.സി.എ വൈസ് പ്രസിഡന്റ് ലിയോ ജോസഫ്, ട്രഷറര് നിക്സണ് വര്ഗീസ്, സ്പോര്ട്സ് സെക്രട്ടറി സോവിച്ചന് ചേന്നാട്ടുശ്ശേരി, എന്റര്ടൈന്മെന്റ് സെക്രട്ടറി ജിയോ ജോയ്, ലോഞ്ച് സെക്രട്ടറി ജിന്സ് ജോസഫ്, കോര് ഗ്രൂപ് ചെയര്മാന് അരുള്ദാസ് തോമസ്, കെ.സി.എ മുന് പ്രസിഡന്റ് എബ്രഹാം ജോണ്, കെ.സി.എ അംഗങ്ങൾ, കുടുംബാംഗങ്ങൾ, ലേഡീസ് വിങ് അംഗങ്ങൾ യുടങ്ങിയവർ ചടങ്ങില് സംബന്ധിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.