അഞ്ചു പച്ചക്കറി ചന്തകൾ തുറന്നു, ഗുണം മെച്ചം വിലയും

ദോഹ: 150 ഫാമുകളിൽനിന്നുള്ള നല്ല ഒന്നാന്തരം ഫ്രഷ്​ പച്ചക്കറികൾ. മത്സരസ്വഭാവത്തിലുള്ള വില ആയതിനാൽ ഉപഭോക്താക്കൾക്കും മെച്ചം. വിവിധയിടങ്ങളിലായുള്ള അഞ്ച്​ ശൈത്യകാല പച്ചക്കറി മാർക്കറ്റുകൾ തുറന്നു. അൽഷഹാനിയ, അൽ മസ്​റുഅ, അൽ വക്​റ, അൽഖോർ അൽ ദകീറ, അൽ ഷമാൽ എന്നിവിടങ്ങളിലാണ്​ 2019-2020 സീസണിലേക്കുള്ള മാർക്കറ്റുകൾ പ്രവർത്തനം തുടങ്ങിയത്​. വ്യാഴാഴ്​ച മുതൽ ശനിയാഴ്​ച വരെ രാവിലെ ഏഴ്​ മുതൽ വൈകുന്നേരം നാല്​ മണിവരെയാണ്​ പ്രവർത്തനം. മുനിസിപ്പാലിറ്റി പരിസ്​ഥിതി മന്ത്രാലയത്തിന് കീഴിലുള്ള കാർഷിക വകുപ്പാണ്​ നേതൃത്വം നൽകുന്നത്​. കക്കിരി, തക്കാളി, ഉള്ളി, വെള്ളുള്ളി, ഉരുളക്കിഴങ്ങ്​, മാരോപ്പഴം, വഴുതന, ഇലയിനത്തിലുള്ള വിവിധയിനം പച്ചക്കറികൾ, മത്തൻ തുടങ്ങിയവയാണ്​ ഉള്ളത്​. വിവിധയിനം പഴങ്ങളുടെ വൻ ശേഖരവുമുണ്ട്​. ​

പ്രാദേശിക ഫാമുകളിൽനിന്നുള്ള ഉന്നതഗുണനിലവാരമുള്ള ഈത്തപ്പഴം, തേൻ എന്നിവയും ലഭ്യമാണ്​. 125 പ്രാദേശിക ഫാമുകളുടെ വിളകളാണുള്ളത്​. എല്ലാവിധ കോവിഡ്​ പ്രതിരോധ നടപടികളും പാലിച്ചാണ്​ പ്രവർത്തനം. പ്രവേശനകവാടത്തിൽ ഇഹ്​തിറാസ്​ ആപ്പിലെ പച്ച സ്​റ്റാറ്റസ്​ കാണിക്കണം. എങ്കിൽ മാത്രമേ പ്രവേശനമുള്ളൂ. പച്ചക്കറികൾ കൊണ്ടുവരുവാനുള്ള പെട്ടികൾ, വിൽപനക്കുള്ള സൗജന്യ സ്​റ്റാളുകൾ തുടങ്ങിയവ മന്ത്രാലയമാണ്​ കൃഷിക്കാർക്ക്​ നൽകുന്നത്​. ഇടനിലക്കാരില്ലാതെ തങ്ങളുടെ ഉൽപന്നങ്ങൾ നേരിട്ട്​ ഉപഭോക്താക്കൾക്ക്​ എത്തിക്കാൻ ചന്തകളിലൂടെ കർഷകർക്ക്​ കഴിയും. തങ്ങളുടെ നിക്ഷേപത്തിനും അധ്വാനത്തിനും അനുസരിച്ച വില ഇതിനാൽ കർഷകർക്ക്​ ലഭിക്കുന്നു.

പ്രാദേശികമായി ഉൽപാദിപ്പിക്കുന്ന പച്ചക്കറികളുടെ 31 ശതമാനവും മന്ത്രാലയം അനുവദിക്കുന്ന ഇത്തരം ചന്തകളിലൂടെയും മറ്റ്​ മാർഗങ്ങളിലൂടെയുമാണ്​ വിൽപന നടത്തുന്നത്​. ഇതിൽ 11 ശതമാനം ഉൽപന്നങ്ങളും ശൈത്യകാല വിപണികളിലൂടെയാണ്​. ഉപഭോക്താക്കളെ ആകർഷിക്കുന്നതിന് ന്യായവിലയിൽ പച്ചക്കറികൾ വിൽക്കുന്നതിന് ഫാമുടമകൾക്ക് മന്ത്രാലയത്തിെൻറ പൂർണപിന്തുണയുണ്ട്​.

മന്ത്രാലയത്തിെൻറ പിന്തുണയോടെ പച്ചക്കറി ഉൽപാദനം വർധിപ്പിക്കാനായെന്നാണ്​ കർഷകരുടെയും ഫാമുടമകളുടെയും അഭിപ്രായം. പച്ചക്കറി വിത്തുകളും വളവും മറ്റു കാർഷികോപകരണങ്ങളും അനുബന്ധ സാധനങ്ങളും സൗജന്യമായാണ് കർഷകർക്ക്​ ലഭിക്കുന്നത്​​. കഴിഞ്ഞ സീസണിൽ 16,000 ടൺ പച്ചക്കറികളാണ്​ ചന്തകളിലൂടെ വിറ്റഴിക്കാനായത്​.