മന്ത്രി ഇടപെട്ടു; എടയാറ്റുചാലിലേക്ക്​ രാസമയമുള്ള വെള്ളമൊഴുക്കുന്നത്​ നിലച്ചു, കർഷകർക്ക്​ ആശ്വാസം

ആലുവ: മുന്നൂറ് ഏക്കർ വിസ്തൃതിയുള്ള എടയാറ്റുചാലിലേക്ക് രാസമയമുള്ള വെള്ളം ഒഴുകുന്നതിനെതിരെ മന്ത്രി. മലിന്യ പ്രശ്നം അറിഞ്ഞതിനെ തുടർന്ന് മന്ത്രി പി. രാജീവ് ഇടപെട്ട്​ മാലിന്യപ്രവാഹം തടസപ്പെടുത്താനുള്ള നടപടികൾ സ്വീകരിച്ചു. കഴിഞ്ഞ ദിവസം മേജർ ഇറിഗേഷൻ എക്സിക്യൂട്ടീവ് എഞ്ചിനിയർ സന്ധ്യ സ്ഥലം സന്ദർശിച്ച് അടിയന്തിരമായി മാലിന്യ കുഴൽ അടക്കാൻ ബന്ധപ്പെട്ടവരെ ചുമതലപ്പെടുത്തി. ഇതി​െൻറ ഭാഗമായി പകലും രാത്രിയും പണികൾ നടന്നു.

പെരിയാറിൽ നിന്നും എടയാറ്റുചാലിലേക്ക് സ്വാഭാവികമായി വെള്ളം ഒഴുകിയെത്തുന്നതിന് ഏഴു വർഷങ്ങൾക്ക് മുമ്പ് ജലസേജന വകുപ്പ് ഒരു ഭൂഗർഭ കുഴൽ സ്ഥാപിച്ചിരുന്നു. അശാസ്ത്രീയമായി നിർമ്മിച്ചതുകൊണ്ട് ഇതുവരെ അതിലൂടെ വെള്ളം ഒഴുകിയിട്ടില്ല. എന്നാൽ, ആ കുഴലിലൂടെ ഇടക്കിടെ രാസമയമായ ചുവന്ന വെളളം ഒഴുകുന്നു എന്ന് പരാതി ഉയർന്നു. ഇതു പരിഗണിച്ച് ദേശീയ ഹരിത ട്രൈബൂണൽ വ്യവസായ വകുപ്പി​െൻറയും ജലസേചനവകുപ്പി​െൻറയും മലിനീകരണ നിയത്രണ ബോർഡി​െൻറയും ഉദ്യോഗസ്ഥർ അടങ്ങുന്ന ഒരു കമ്മിറ്റിയെ പ്രശ്നം പഠിക്കാൻ ചുമതലപ്പെടുത്തി. ആ കമ്മിറ്റിയുടെ നിർദ്ദേശപ്രകാരം പെരിയാറിലേക്കു ചുവന്ന വെളളം ഒഴുകുന്ന കുഴലി​െൻറ ഭാഗം ജലസേചന വകുപ്പ് കോൺക്രീറ്റ് നിറച്ച് അടച്ചു.

പുഴയിലേക്കുള്ള ജലപ്രവാഹം തടസപ്പെട്ടതോടെ എടയാറ്റുചാലിലേക്ക് തുറന്നിരിക്കുന്ന കുഴലി​െൻറ ഭാഗത്തുകൂടി മലിന ജലം ഒഴുകാൻ തുടങ്ങി. ഇതോടെ കർഷകർ പ്രത്യക്ഷമായി സമര രംഗത്ത് വരുന്ന അവസ്ഥയുണ്ടായി. ഇതി​െൻറ ഭാഗമായി എടയാറ്റുചാൽ നെല്ലുല്പാദക സമിതി പ്രസിഡൻറും ആലങ്ങാട് ബ്ലോക്ക് പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷനുമായ പി.എ. അബൂബക്കർ വ്യവസായ വകുപ്പ് മന്ത്രിക്ക് നേരിട്ട് നിവേദനം നൽകി. വളരെ പെട്ടെന്ന് മന്ത്രിയുടെ ഭാഗത്തുനിന്നും പരിഹാര നടപടികൾ ഉണ്ടായതിൽ കർഷകരാകെ സന്തോഷത്തിലാണ്.