കോതമംഗലം കെ.എസ്.ആർ.ടി.സി സ്​റ്റാൻഡ്​: പുതിയ ടെർമിനൽ നിർമാണം രേഖയിലുറങ്ങുന്നു

കോതമംഗലം: കോതമംഗലം കെ.എസ്.ആർ.ടി.സി സ്​റ്റാൻഡിലെ ഓഫിസ് കെട്ടിടത്തിൽ ജീവനക്കാർ ജോലിയെടുക്കുമ്പോൾ അപകടം തലക്കുമുകളിലാണ്. ഏത് നിമിഷവും നിലംപൊത്താവുന്ന സ്ഥിതിയിലാണ് ഓഫിസ് കെട്ടിടം. പുതിയ ടെർമിനൽ നിർമാണത്തിന്​ 1.87 കോടി അനുവദിച്ചിട്ട് മൂന്ന് വർഷം പിന്നിടുന്നു.

പൊളിച്ച് നീക്കാനുള്ള ടെൻഡർ നടപടി രണ്ട് തവണ മാറ്റി ​െവച്ചു. കാലപ്പഴക്കം ചെന്ന കെട്ടിടത്തിന് സർക്കാർ നിശ്ചയിച്ച വിലയ്​ക്ക് ലേലം ചെയ്യാൻ കരാറുകാർ തയാറാകാതെ വന്നതാണ് ടെൻഡർ മാറ്റി​െവക്കാൻ കാരണം. മതിപ്പ് വില കുറച്ച് പുതിയ ടെൻഡറിന് അനുമതി തേടിയിരിക്കുകയാണ് .

കെട്ടിടം പൊളിച്ചുനീക്കിയാൽ മാത്രമേ പുതിയ ടെർമിനൽ നിർമാണം ആരംഭിക്കാൻ കഴിയുകയുള്ളു. 2018-19 കാലഘട്ടത്തിൽ ആധുനിക ബസ് ടെർമിനൽ നിർമാണത്തിനായി എം.എൽ.എ ആസ്തി വികസന ഫണ്ടിൽ നിന്നാണ്​ 1.87 കോടി രൂപ അനുവദിച്ച് ഭരണാനുമതി ലഭ്യമായത്. 6000 ചതുരശ്ര അടി വരുന്ന ഗ്രൗണ്ട് ഫ്ലോറും,4000 ചതുരശ്ര അടി വരുന്ന ഫസ്​റ്റ് ഫ്ലോറും അടക്കം 10,000 ചതുരശ്ര അടി കെട്ടിടം നിർമിക്കാനാണ്​ പദ്ധതി.

ഗ്രൗണ്ട് ഫ്ലോറിൽ സ്​റ്റേഷൻ മാസ്​റ്ററുടെ കാര്യാലയം, അന്വേഷണ കൗണ്ടർ, പുരുഷൻമാർക്കും സ്ത്രീകൾക്കും പ്രത്യേക കാത്തിരിപ്പുകേന്ദ്രം, അടക്കമുള്ള സൗകര്യങ്ങളാണ് വിഭാവന ചെയ്​തിരിക്കുന്നത്​. ഫസ്​റ്റ് ഫ്ലോറിൽ ആധുനിക ഓഫിസ് സമുച്ചയം, ടോയ്​ലറ്റ്​ ബ്ലോക്ക്, വാഷ് ഏരിയ അടക്കമുള്ള സൗകര്യങ്ങളും ഏർപ്പെടുത്തും. കെട്ടിടത്തിന്​ മുന്നിലായി നിർമിക്കുന്ന ആധുനിക ബസ് ബേയോടനുബന്ധിച്ച് ബസ് പാർക്കിങ്ങിനായി ബസ് യാഡും നിർമിക്കും. അതോടൊപ്പം നിർദിഷ്​ട കെട്ടിടത്തി​െൻറ പുറകു വശത്തായി സംരക്ഷണ ഭിത്തിയുംപദ്ധതിയിലുണ്ട്​.

എന്നാൽ, പഴയ കെട്ടിടം പൊളിക്കൽ എങ്ങുമെത്തിയിട്ടില്ല. ഒരു എക്സ്പ്രസ്, നാല് സൂപ്പർഫാസ്​റ്റ്, ഏഴ് ഫാസ്​റ്റ് അടക്കം 37 ഷെഡ്യൂളുകളാണ് ഇവിടെ നിന്നും ഓപറേറ്റ് ചെയ്യുന്നത്. ഹൈറേഞ്ചിലേക്കുള്ള യാത്രക്കാരുടെ ഇടത്താവളം എന്ന നിലയിൽ തിരക്കേറിയ ബസ് സ്​റ്റാൻഡ്​ ആകേണ്ടതാണിവിടം. എന്നാൽ, സ്വകാര്യ സ്​റ്റാൻഡിനെയാണ് കെ.എസ്.ആർ.ടി.സി പോലും ആശ്രയിക്കുന്നത്. ഓപറേറ്റിങ്ങ് സ്​റ്റാൻഡ്​​ മാത്രമായാണ് ഇവിടം പ്രവർത്തിച്ചു വരുന്നത്.