കലിയോടെ പാഞ്ഞടുത്ത്​ ആന; വണ്ടിയിൽ നിന്നിറങ്ങിയോടി യാത്രക്കാർ- വീഡിയോ വൈറൽ

നെഞ്ചിടിപ്പ്​ അൽപം കൂട്ടുന്ന ഒരു വീഡിയോ സമൂഹ മാധ്യമങ്ങളിൽ വൈറലാകുന്നു. കലിതുള്ളി പാഞ്ഞുവരുന്ന ഒരു കൊമ്പൻ സഫാരി ജീപ്പ്​ കുത്തിമറിക്കാൻ ശ്രമിക്കുന്നതും അതിലുള്ളവർ ഇറങ്ങിയോടുന്നതുമാണ്​ വീഡിയോയിലുള്ളത്​.

ദക്ഷിണാഫ്രിക്കയിലെ സെലാറ്റി ഗെയിം റിസർവിൽ നിന്നുള്ള ദൃശ്യമാണിത്​. കുഗ്രർ നാഷണൽ പാർക്കിന്‍റെ ഭാഗമായ ഇവിടെ പരിശീലനം നൽകാനായി ഗൈഡുകളെ കൊണ്ടുപോയ വാഹനത്തിനുനേരെയാണ്​ ആനയുടെ ആക്രമണമുണ്ടായത്​. ഇക്കോ ട്രയ്​നിങ്​ ഗൈഡുകളാണ്​ സഫാരി വാഹനത്തിൽ ഉണ്ടായിരുന്നത്​. ആന ആക്രമിക്കാൻ ശ്രമിക്കുന്ന വീഡിയോ അവരിലൊരാൾ തന്നെയാണ്​ ചിത്രീകരിച്ചതും. ആന പാഞ്ഞടുക്കുന്നതും വാഹനം കുത്തിമറിക്കാൻ ​ശ്രമിക്കുന്നതും 'ഇറങ്ങിയോട്​ ഇറങ്ങ​ിയോട്​' എന്ന്​ അലറി വിളിച്ച്​ വാഹനത്തിലുള്ളവർ ഓടുന്നതുമെല്ലാം വീഡിയോയിലുണ്ട്​.

ട്വിറ്ററിലും ഫേസ്​ബുക്കിലും വീഡിയോ ​വൈറലാകുകയും ചെയ്​തു. പരിശീലകരും ട്രയ്​നി ഗൈഡുകളുമാണ്​ വാഹനത്തിലുണ്ടായിരുന്നതെന്ന്​ ഇക്കോ ​ട്രയ്​നിങ്​ പ്രസ്​താവനയിൽ പറഞ്ഞു.​ ഇണ ചേരാൻ നോക്കുന്നതിനിടെ തങ്ങളുടെ ആവാസ്​ സ്​ഥലത്തേക്ക്​ ആളുകൾ കടന്നുവന്നതാണ്​ ആനയെ പ്രകോപിപ്പിച്ചതെന്ന്​ അവർ വ്യക്​തമാക്കി. വാഹനത്തിന്​ കേടുപാടുകൾ സംഭവിച്ചെങ്കിലും ഭാഗ്യത്തിന്​ വാഹനത്തിനുള്ളിൽ ഉണ്ടായിരുന്നവർ രക്ഷപ്പെടുകയായിരുന്നു.