ബ്രസീൽ ടീം
ജകാർത്ത: ഫുട്ബാളിൽ വീണ്ടും ബ്രസീൽ-അർജന്റീന പോര്. ഇന്തോനേഷ്യയിൽ നടക്കുന്ന അണ്ടർ 17 ലോകകപ്പ് ഫുട്ബാളിന്റെ ക്വാർട്ടർ ഫൈനൽ മത്സരത്തിലാണ് വമ്പന്മാർ മുഖാമുഖം വരുന്നത്. കഴിഞ്ഞ ദിവസം നടന്ന ബ്രസീൽ-അർജന്റീന സീനിയർ ടീമുകളുടെ മത്സരത്തിന്റെയും ആവേശത്തിന്റെയും അലയൊലികൾ അവസാനിക്കുന്നതിന് മുമ്പ് വീണ്ടും ഒരു ക്ലാസിക് പോരാട്ടത്തിന് വേദിയൊരുങ്ങുകയാണ്. വെള്ളിയാഴ്ച നടക്കുന്ന മത്സരത്തിൽ നിലവിലെ ജേതാക്കളായ ബ്രസീലുമായി അർജന്റീന ഏറ്റുമുട്ടും.
ബ്രസീൽ ഇക്കുറി ആദ്യമത്സരത്തിൽ പരാജയപ്പെട്ടാണ് തുടങ്ങിയത്. ഇറാനോട് 3-2ന് തോറ്റ കാനറികൾ ന്യൂ കാലിഡോണിയയെ 9-0ന് പരാജയപ്പെടുത്തുകയും ഇംഗ്ലണ്ടിനെതിരെ 2-1ന് ജയിക്കുകയും ചെയ്‌തതോടെയാണ് ബ്രസീൽ പ്രീക്വാർട്ടറിൽ പ്രവേശിച്ചത്. എക്വഡോറിനെ 3-1ന് പരാജയപ്പെടുത്തിയാണ് ക്വാർട്ടറിലേക്ക് എത്തിയത്.
അർജന്റീന ടീം
അർജന്റീനയും തോറ്റായിരുന്നു തുടക്കം. സെനഗലിനോട് 2-1ന് തോറ്റുതുടങ്ങിയ അർജന്റീന ജപ്പാനെ 3-1നും പോളണ്ടിനെ ഏകപക്ഷീയമായ നാലുഗോളുകൾക്കും തകർത്തായിരുന്നു പ്രീക്വാർട്ടർ പ്രവേശം ഉറപ്പിച്ചത്. പ്രീക്വാർട്ടറിൽ വെനിസ്വേലയെ 5-0ന് തകർത്താണ് ക്വാർട്ടറിലേക്ക് കടന്നത്. നേരത്തെ പ്രീക്വാർട്ടറിൽ ഇംഗ്ലണ്ട്, യു.എസ്.എ എന്നീ ടീമുകൾ പുറത്തായിരുന്നു. വെള്ളിയാഴ്ച ആദ്യ ക്വാർട്ടറിൽ സ്പെയിൻ ജർമനിയുമായി ഏറ്റുമുട്ടും. ശനിയാഴ്ച ഫ്രാൻസ് ഉസ്ബകിസ്താനുമായും മൊറാക്കോ മാലിയുമായും ഏറ്റുമുട്ടും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.