ഹരിദ്വാർ: ഒളിമ്പിക്സ് വനിത ഹോക്കി സെമി ഫൈനലിൽ തോൽവി വഴങ്ങിയതിന് പിന്നാലെ കടുത്ത ജാതിയധിക്ഷേപമാണ് ഇന്ത്യൻ താരം വന്ദന കതാരിയക്ക് നേരിടേണ്ടി വന്നത്. സവർണ ജാതിക്കോമരങ്ങളുടെ അധിക്ഷേപങ്ങൾക്ക് ഉഗ്രൻ ഗോളിലൂടെയാണ് വന്ദന മറുപടി നൽകിയത്. ബ്രിട്ടനെതിരായ വെങ്കല പോരാട്ടത്തിൽ ഇന്ത്യയുടെ തോൽവിക്കിടയിലും സന്തോഷം നൽകുന്നതാണ് വന്ദനയുടെ പ്രകടനം. മത്സരത്തിൽ ഇന്ത്യക്കായി നിർണായക ഗോളാണ് വന്ദന നേടിയത്.
രണ്ടാം ക്വാർട്ടറിലാണ് വന്ദനയുടെ നിർണായക ഗോൾ പിറന്നത്. ബ്രിട്ടന്‍റെ പ്രതിരോധ താരത്തിന്‍റെ പിഴവിൽ നിന്നും പന്ത് കണ്ടെത്തിയ വന്ദന ഗോൾകീപ്പർക്ക് ഒരു അവസരവും നൽകാതെയായിരുന്നു സ്കോർ ചെയ്തത്. ടൂർണമെന്‍റിലെ വന്ദനയുടെ നാലാം ഗോളായിരുന്നു അത്. വന്ദനയുടെ ഗോളാണ് മത്സരത്തിൽ ഇന്ത്യക്ക് ലീഡ് സമ്മാനിച്ചത്. തനിക്കെതിരായി ഉയർന്ന ജാതിയധിക്ഷേപ ആരോപണങ്ങൾക്ക് കളിക്കളത്തിൽ ഗോളിലൂടെ മറുപടി നൽകിയിരിക്കുകയാണ് താരം.
ബുധനാഴ്ച അർജന്‍റീനക്കെതിരെ ഇന്ത്യ സെമിയിൽ തോറ്റതിന് പിന്നാലെയാണ് ഹരിദ്വാറിലെ റോഷ്നബാദിലുള്ള വന്ദനയുടെ വീടിന് സമീപത്തെത്തി സവർണരായ ചിലർ ജാതി അധിക്ഷേപം നടത്തിയത്. ടീമിൽ കുറേ ദലിത് കളിക്കാർ ഉള്ളത് കൊണ്ടാണ് തോറ്റതെന്ന് ആരോപിച്ച് അവർ വന്ദനയുടെ വീടിന് മുമ്പിൽ വെച്ച് പടക്കം പൊട്ടിക്കുകയും താളം ചവിട്ടുകയും ചെയ്തു.
വന്ദനയുെട കുടുംബം സംഭവം പൊലീസിൽ റിപ്പോർട്ട് ചെയ്തിരുന്നു. പിന്നാലെ പ്രതികളിൽ ഒരാൾ അറസ്റ്റിലായി. തോൽവിക്ക് പിന്നാലെ സവർണ ജാതിക്കാർ തങ്ങളെ എങ്ങനെയാണ് അധിക്ഷേപിച്ചതെന്ന് വന്ദനയുടെ കുടുംബം പൊലീസിനോട് വിവരിച്ചു.
'അവർ ഞങ്ങളുടെ കുടുംബത്തെ ജാതീയമായി അധിക്ഷേപിച്ചു, അപമാനിച്ചു. ധാരാളം ദലിതർ ടീമിലുള്ളതിനാലാണ് ഇന്ത്യ തോറ്റതെന് അവർ പറഞ്ഞു. ഹോക്കി മാത്രമല്ല എല്ലാ കായിക ഇനങ്ങളിൽ നിന്നും ദലിതരെ അകറ്റി നിർത്തണമെന്നും പറഞ്ഞു. തങ്ങളുടെ വസ്ത്രം പൊക്കിക്കാണിച്ചാണ് അവർ നൃത്തം ചവിട്ടിയത്' -വന്ദനയുടെ സഹോദരൻ ശേഖർ പറഞ്ഞു.
ടൂർണമെന്‍റിൽ ഹാട്രിക് നേടിയ ആദ്യ ഇന്ത്യൻ താരമായി വന്ദന മാറിയിരുന്നു. പൂൾ 'എ'യിലെ അവസാന മത്സരത്തിൽ ദക്ഷിണാഫ്രിക്കക്കെതിരെ ഇന്ത്യ നേടിയ നാലിൽ മൂന്നും വന്ദനയുടെ വകയായിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.