രാത്രിയെ അപ്പാടെ മൊഴിമാറ്റി നിലാവെന്ന് എഴുതപ്പെട്ട പാതി ഇരുട്ടിൽ അവർക്ക് ചിറകുകളുണ്ടായി നിറങ്ങൾ പകർത്താൻ ഒരു പാപ്പാത്തി പറന്നു വന്നിരുന്നു വസന്തമെന്ന അവന്റെ ശയ്യയിൽ കണ്ണുകൾ വീശിക്കൊണ്ട് നടന്നു മുന്നേറിയ മഴവെളിച്ചത്തിൽ കാട്ടുപാതയിൽ പായലലംകൃത...
രാത്രിയെ അപ്പാടെ
മൊഴിമാറ്റി
നിലാവെന്ന്
എഴുതപ്പെട്ട
പാതി ഇരുട്ടിൽ
അവർക്ക്
ചിറകുകളുണ്ടായി
നിറങ്ങൾ പകർത്താൻ
ഒരു പാപ്പാത്തി
പറന്നു വന്നിരുന്നു
വസന്തമെന്ന
അവന്റെ ശയ്യയിൽ
കണ്ണുകൾ വീശിക്കൊണ്ട്
നടന്നു മുന്നേറിയ
മഴവെളിച്ചത്തിൽ
കാട്ടുപാതയിൽ
പായലലംകൃത മതിൽപ്പുറങ്ങളിൽ
ഇരുഹൃദയമായ്
പൂവമ്പുകളായ്
ഓരോ ദേശത്തും
അവരുണ്ടായിരുന്നു
സിത്താര+മനോഹരൻ
മുനീർ+ജാസ്മിൻ
സുഭാഷിണി ലവ് ജോസഫ്
മനു ലവ് സോണിയ
വരകളായവർ
മഞ്ഞിലും മഴയിലും
പുതഞ്ഞ്
മാഞ്ഞു തുടങ്ങുമ്പോൾ
സെൽഫിക്കാലത്തും
അക്ഷരങ്ങളായവ
ആകാശം നോക്കി കിടക്കും
പൂക്കളും
കരിയിലകളും
കൽപടവുകളിൽ
അനുകരിച്ചിരിക്കേ
ഒരു പ്രാചീനഗൃഹം
അവർക്കായി വെയിൽകൊണ്ട്
തലകുനിച്ചു നിൽക്കും
സ്നേഹഭാരത്താൽ
ഹൃദയം കുനിഞ്ഞവൾ
അവസാന തരി
വിഷാദത്തെയും
പാറ്റിക്കളയാൻ
പാട്ടുമൂളിക്കൊണ്ടിരിക്കും
അല്ലെങ്കിൽ
തൊങ്ങലുകളെ
വിരലുകളിലെന്നപോലെ
മുറുകെപ്പിടിക്കും
നിലാവിനെ
കുത്തിവരകളാലൊരുക്കിയ
കുസൃതിക്കൂട്ടിലേക്കാനയിക്കും
തെരുവുവിളക്കിനെ
അമ്പിളിയെന്ന് തെറ്റിവായിച്ചപ്പഴേ ഒന്ന് നടുങ്ങി
പിന്നെ ടാർപ്പായ നീല ആകാശമെന്ന് കരുതിയതും
അതൊരു വീടിൻ
പിന്നാമ്പുറം എന്നറിയേ
പിന്നെയും ഊർന്നു വീണു
സ്വപ്നമിച്ചഭൂമികളിലേക്ക്
മ(മാ)നംനോക്കിപ്പടങ്ങൾ.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.