വെളിച്ചത്തിന്റെ കിലുക്കമകലെ ക്കേട്ടതേയുള്ളൂ ദാ കാക്കച്ചിറകടി പതിവുപോലെ പറന്നുവന്നു ജനൽപ്പടിമേലിരിപ്പായി ഭ്രാന്തന്റെ വളർത്തുകാക്കയാണ് കൊക്കിലിരുന്ന തളിർപ്പച്ച യകത്തേക്കെറിഞ്ഞു രായിരനല്ലൂര് നിന്നാണ് വരവ് ദേശാന്തരങ്ങളുടെ കലക്കം കരിം ചിറകുകളിൽ ക്കാളിനിൽക്കുന്നു പൊട്ടിത്തരിച്ച വെട്ടം മുറ്റത്തു മൗനിച്ചു നിൽപായ് കാക്ക...
വെളിച്ചത്തിന്റെ കിലുക്കമകലെ
ക്കേട്ടതേയുള്ളൂ ദാ
കാക്കച്ചിറകടി
പതിവുപോലെ പറന്നുവന്നു
ജനൽപ്പടിമേലിരിപ്പായി
ഭ്രാന്തന്റെ വളർത്തുകാക്കയാണ്
കൊക്കിലിരുന്ന തളിർപ്പച്ച
യകത്തേക്കെറിഞ്ഞു
രായിരനല്ലൂര് നിന്നാണ് വരവ്
ദേശാന്തരങ്ങളുടെ കലക്കം കരിം
ചിറകുകളിൽ
ക്കാളിനിൽക്കുന്നു
പൊട്ടിത്തരിച്ച വെട്ടം മുറ്റത്തു
മൗനിച്ചു നിൽപായ്
കാക്ക ചോദിച്ചു
രണ്ടു കൊത്തിനഴിച്ചുവിടട്ടേ
ഒറ്റക്കൊത്തിനഴിച്ചുവിടട്ടേ
വേണ്ട
പിന്നെയോ
ഉച്ചിയിൽത്തീയാളി വെട്ടം
വേരുമോർമയും പൊട്ടിച്ച്
ചിതറിനടക്കുന്നു
മാടക്കാക്കേ
മാടക്കാക്കേ
ഇടംകാലിലെയിച്ചെങ്ങല
വലംകാലിലാക്കിത്തരൂ
ഇടംകാലിലെയിച്ചെങ്ങല
വലംകാലിലാക്കിത്തരൂ
ഇടംകാൽച്ചെങ്ങല വലംകാലിൽ ഹായ്
കാക്കവരവുകളിൽ
ഇടംകാലിൽനിന്നു വലംകാലിലേക്ക്
വലംകാലിൽ നിന്നിടംകാലിലേക്ക്
വലംകാലിലേ
ക്കിടംകാലിലേക്കു
മാറിമാറിമാറി
യനാദിഭൂതത്തിലേക്കു നീണ്ടുപോകും ചെങ്ങലയുടെയേതോ
തുരുമ്പൻകണ്ണിക്കുള്ളിലിരുന്നു
മുറ്റി
മുറ്റി
മുറ്റി
മുറ്റി
മുറ്റി
മുറ്റി
മുറ്റി
മുറ്റി
മുറ്റി
യൊരു
പൊട്ടിച്ചിരി
ചുറ്റും
ചിതറിക്കിടക്കുന്നൂ
ചെറു
ചെറു
കല്ലുകൾ.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.