ബ്രെയ് ലി,അക്കരെ

1. ബ്രെയ് ലി

തുറന്ന പുസ്തകം

വിരൽത്തുമ്പാൽത്തൊട്ടു -

പഠിക്കും കുട്ടിയു -

ണ്ടരികിലെ സീറ്റിൽ

ഒളികണ്ണാൽക്കണ്ടു

വിരലോടും താളിൽ

നിരന്ന കുത്തുകൾ

തിണർത്തു നിൽക്കുന്നു.

വെളിച്ചം വീഴാത്ത

ഇരുണ്ട ഭൂമിയാ-

ണവന്റെ കൺമണി

തിളക്കമില്ലതിൽ

ഒരിക്കലും ചന്ദ്ര-

നുദിക്കാത്ത, കടും -

കറുപ്പ് രാത്രിയാ -

ണവന്റെ നാളുകൾ.

അടുത്തിരുന്നതാം

സുഹൃത്തിൻ കൈപിടി-

ച്ചവനിറങ്ങുന്നു,

ഇഴഞ്ഞു തീവണ്ടി.

ഇരുട്ടിൻ കണ്ണുമായ്

തണുത്ത കാറ്റപ്പോൾ

മലനിരകളെ

തൊടുന്നു, വായിക്കാൻ

2. അക്കരെ

കറന്റ് പോയ രാത്രി, ചൂട്

വീട്ടിൽ നിന്നിറങ്ങി ഞാൻ

നടന്നു, കാറ്റു കൊള്ളുവാൻ

കലുങ്കിൽ വിശ്രമിക്കുവാൻ

കറുപ്പിനക്കരെ, വെളുത്ത

പൊട്ടുപോലെ ഒറ്റവീടി-

രുട്ടിനാൽപ്പൊതിഞ്ഞു,

ദൃശ്യമല്ലവേറെയൊന്നുമേ

ചെറുപ്പനാളിലോടിവീണ

മുറ്റമാണതെങ്കിലും

അടുത്ത കൂട്ടുകാരനാ-

ണതിൽക്കിടപ്പതെങ്കിലും

ഇരുട്ടിരുണ്ടദ്രവ്യമായ്

ഉദിച്ചുവന്ന ഗോളമായ്

എനിക്കു തോന്നി, ദൂരെയുള്ള

വീടു നോക്കി നിൽക്കവേ

വരമ്പിലോടി എത്രനാൾ

കടന്നുപോയ്, വകഞ്ഞതാം

കുറുക്കുപാത പുല്ലുമൂടി

ഒക്കെയും മറന്നുപോയ്.

തിരിച്ചുവീണ്ടുമക്കരെയ്ക്ക്

പോയ് മടങ്ങിയെത്തുവാൻ

പ്രകാശവർഷമെത്ര പിന്നി-

ലേക്ക് ഞാൻ നടക്കണം.