ഡോ. ടെസ്സി തോമസ്
മസ്കത്ത്: ഇന്ത്യന്‍ സോഷ്യല്‍ ക്ലബ് (ഐ.എസ്.സി) മലയാള വിഭാഗത്തിന്റെ സാംസ്കാരിക അവാര്‍ഡ് ഇന്ത്യയിലെ മുൻനിര ശാസ്ത്രജ്ഞ ഡോ. ടെസ്സി തോമസിന് സമ്മാനിക്കും. മസ്കത്ത് ഇന്ത്യന്‍ സോഷ്യല്‍ ക്ലബ് മലയാള വിഭാഗം കണ്‍വീനര്‍ അജിത് വാസുദേവന്റെ നേതൃത്വത്തിലുള്ള ഭരണസമിതിയാണ് അവാര്‍ഡ് പ്രഖ്യാപിച്ചത്.
ശാസ്ത്രവും സാങ്കേതികതയും ഉപയോഗിച്ച് ഇന്ത്യയുടെ സംരക്ഷണ ശേഷി വർധിപ്പിക്കാൻ നടത്തിയ പരിശ്രമങ്ങളും അഗ്നി, പരവീഴ്ച, നാഗി തുടങ്ങിയ ആധുനിക മിസൈലുകൾ വികസിപ്പിക്കുന്നതിൽ ശാസ്ത്രീയമായ മുന്നേറ്റങ്ങൾ നടത്തിയതിനും സ്ത്രീ ശാക്തീകരണം, വിദ്യാർഥികൾക്കായി ശാസ്ത്രവും സാങ്കേതികതയും പ്രോത്സാഹിപ്പിക്കുന്നതിലും നൽകിയ പങ്കുകൾ പരിഗണിച്ചാണ് അവാര്‍ഡിന് തിരഞ്ഞെടുത്തതെന്ന് കണ്‍വീനര്‍ അജിത് വാസുദേവൻ പറഞ്ഞു.
മലയാള വിഭാഗത്തിന്റെ ഈ വര്‍ഷത്തെ ഓണാഘോഷ പരിപാടികളുടെ ഭാഗമായി വെള്ളിയാഴ്ച അല്‍ ഫെലാജ് ലേ ഗ്രാന്‍ഡ് ഓഡിറ്റോറിയത്തില്‍ നടക്കുന്ന ചടങ്ങില്‍ അജിത് വാസുദേവൻ സാംസ്കാരിക അവാര്‍ഡ് ഡോ. ടെസ്സി തോമസിന് സമ്മാനിക്കും. അവാര്‍ഡ് ദാനത്തോടനുബന്ധിച്ചു നടക്കുന്ന സാംസ്കാരിക സമ്മേളനത്തില്‍ മസ്കത്ത് ഇന്ത്യന്‍ സോഷ്യല്‍ ക്ലബ് ചെയർമാൻ ബാബു രാജേന്ദ്രൻ പങ്കെടുക്കും.
കലാ സാംസ്കാരിക രംഗത്ത് മികച്ച പ്രവര്‍ത്തനങ്ങള്‍ കാഴ്ചവെക്കുന്ന അതുല്യ പ്രതിഭകള്‍ക്ക് ഓണാഘോഷങ്ങളുടെ ഭാഗമായി 1996 മുതല്‍ തുടര്‍ച്ചയായി മലയാള വിഭാഗം നല്‍കി വരുന്നതാണ് കലാ സാംസ്കാരിക അവാര്‍ഡ്. എന്നാൽ, കഴിഞ്ഞ വർഷം മുതൽ കലാ സാംസ്കാരിക മേഖല കൂടാതെ സാമൂഹിക ശാസ്ത്ര സാങ്കേതിക രംഗത്തുള്ളവർക്കു കൂടി അവാർഡുകൾ നൽകി ആദരിക്കാൻ മലയാള വിഭാഗം തീരുമാനിക്കുകയായിരുന്നു.
കഴിഞ്ഞ 28 വർഷമായി ഒമാനിലെ സാമൂഹ്യ സാംസ്കാരിക രംഗത്തെ സജീവ സാന്നിധ്യമാണ് മസ്കത്ത് ഇന്ത്യൻ സോഷ്യൽ ക്ലബിന്റെ മലയാള വിഭാഗം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.