ലോകത്തിലെ വലിയ ഉരു ഖസബ്​ തുറമുഖത്ത്​ എത്തി

മസ്​കത്ത്​: ലോകത്തിലെ ഏറ്റവും വലിയ മരത്തിൽ നിർമിച്ച ഉരു എന്ന ഗിന്നസ്​ ബഹുമതിക്ക്​ അർഹമായ 'ഒബൈദ്​'ഖസബ്​ തുറമുഖത്ത്​ എത്തി. യു.എ.ഇയിലെ മാജിദ്​ ഒബൈദ്​ ബിൻ മാജിദ്​ അൽ ഫലാസി ആൻറ്​ സൺസ്​ എന്ന കമ്പനി നിർമിച്ച ഉരുവിന്​ 91.47 മീറ്റർ നീളവും 20.41 മീറ്റർ വീതിയുമാണ്​ ഉള്ളത്​. കഴിഞ്ഞ വർഷമാണ്​ ഇത്​ നീറ്റിലിറങ്ങിയതും ഗിന്നസ്​ ബുക്കിൽ ഇടം പിടിച്ചത്​. സ്​റ്റാൻഡേർഡ്​ അമേരിക്കൻ ഫുട്​ബാൾ മൈതാനിയുടെയത്ര വീതിയാണ്​ ഇൗ ഉരുവിനുള്ളതെന്ന്​ ഗിന്നസ്​ റെക്കോർഡിൽ പറയുന്നു.

കുത്തനെ നിർത്തിയാൽ ലണ്ടനിലെ ബിഗ്​ബെന്നിനോളം ഇതിന്​ ഉയരം വരും. 11.229 മീറ്റർ ഉയരമുള്ള ഉരുവിന്​ 2500 ടൺ ആണ്​ ഭാരം. പ്രാദേശികമായും അന്തർദേശീയമായുമുള്ള ഉൽപന്നങ്ങൾ ഉപയോഗിച്ച്​ നിർമിച്ച ഉരുവിന്​ ആറായിരം ടൺ ഭാരം വഹിക്കാൻ ശേഷിയുണ്ട്​. 1700 ടൺ മരവും 800 ടൺ ഉരുക്കുമാണ്​ ഇതി​െൻറ നിർമാണത്തിനായി ഉപയോഗിച്ചിരിക്കുന്നത്​. 1850 ഹോഴ്​സ്​പവർ ശേഷിയുള്ള എഞ്ചിനാണ്​ ഇതിന്​ കരുത്ത്​ പകരുന്നത്​. യു.എ.ഇയിൽ നിന്നുള്ള ചരക്കുഗതാഗതത്തിനാണ്​ ഇത്​ ഉപയോഗിക്കുന്നത്​.