വലിയ പാർട്ടികൾക്ക്​ ഞങ്ങളോട്​ തൊട്ടുകൂടായ്​മയായിരുന്നു- അസദുദ്ദീൻ ഉവൈസി

പട്​ന: 2019ൽ കിഷൻഖഞ്ച്​ ഉപതെരഞ്ഞെടുപ്പിൽ കോൺഗ്രസിനെതിരെ അട്ടിമറി വിജയം നേടിക്കൊണ്ടാണ്​ ഹൈദരാബാദ്​ എം.പി അസദുദ്ദീൻ ഉവൈസിയുടെ ആൾ ഇന്ത്യ മജ്​ലിസെ ഇത്തിഹാദുൽ മുസ്​ലിമീൻ (എ.ഐ.എം.ഐ.എം) ബിഹാർ രാഷ്​ട്രീയ ഗോദയിൽ തങ്ങളുടെ വരവറിയിച്ചത്​.

ഒരുവർഷത്തിനിപ്പുറം നിയമസഭ തെരഞ്ഞെടുപ്പിൽ കോൺഗ്രസ്​-ആർ.ജെ.ഡി സഖ്യത്തി​െൻറ വോട്ട്​ ബാങ്കിൽ വിള്ളൽ വീഴ്​ത്തി എ.ഐ.എം.ഐ.എം സീമാഞ്ചൽ മേഖലയിൽ അഞ്ച്​ സീറ്റുകളിൽ നേടിയ വിജയം മഹാസഖ്യത്തെ ഭരണത്തിൽ നിന്ന്​ അകറ്റിയെന്ന വികാരമുണ്ട്​. എന്നാൽ ഇപ്പോൾ വലിയ പാർട്ടികൾ തങ്ങളെ തൊട്ടുകൂടാത്തവരായി കണക്കാക്കിയിരുന്നതായി വെളിപ്പെടുത്തിയിരിക്കുകയാണ്​ ഉവൈസി.

'രാഷ്​ട്രീയത്തിൽ നമ്മൾ തെറ്റുകളിൽ നിന്നാണ്​ പാഠങ്ങൾ പഠിക്കുക. ഞങ്ങളുടെ ബിഹാർ അധ്യക്ഷൻ ഓരോ പാർട്ടി നേതാക്കളെയും വ്യക്തിപരമായി കണ്ട്​ ബന്ധം സ്​ഥാപിക്കാൻ ശ്രമിച്ചിരുന്നു. എന്നാൽ ഞങ്ങളെ തൊട്ടുകൂടാത്തവരായാണവർ കണക്കാക്കിയത്​. പ്രധാനപ്പെട്ട മുസ്​ലിം നേതാക്കളെയടക്കം ഞങ്ങൾ കണ്ടിരുന്നു. എന്നാൽ ഒന്നും നടന്നില്ല' -ഉവൈസി പറഞ്ഞു.

'പാർട്ടിക്ക്​ വളരെ നല്ല ദിവസമായിരുന്നു. വോട്ട്​ ചെയ്​ത്​ ബിഹാറിലെ ജനങ്ങൾ ഞങ്ങളെ അനുഗ്രഹിച്ചു. അവർക്ക്​ എങ്ങനെ നന്ദി അറിയിക്കണമെന്ന്​ അറിയില്ല' -ഉവൈസി പറഞ്ഞു.

'പ്രളയബാധിത മേഖലകൾ കേന്ദ്രീകരിച്ച്​ പ്രവർത്തിക്കാനാണ്​ ഞങ്ങളുടെ ശ്രമം. മഹാമാരി വകവെക്കാതെ വോട്ട്​ രേഖപ്പെടുത്താൻ എത്തിയ ജനങ്ങൾക്ക്​ നന്ദി അറിയിക്കുന്നു. കൂടുതൽ സീറ്റുകളിൽ ജയിക്കാൻ ഞങ്ങൾക്കായില്ല. കാര്യങ്ങൾ വിശദമായി പരിശോധിച്ച്​ അടുത്ത തെരഞ്ഞെടുപ്പിൽ നില മെച്ചപ്പെടുത്താനുള്ള ശ്രമങ്ങൾ ഞങ്ങൾ തുടങ്ങിക്കഴിഞ്ഞു. വോട്ട്​ വിഴുങ്ങികൾ എന്ന്​ പരിഹസിച്ചവർക്കുള്ള മറുപടിയാണ്​ ഈ വിജയം' -ഉവൈസി കൂട്ടിച്ചേർത്തു.

എ.ഐ.എം.ഐ.എം നിലപാടിനെ രൂക്ഷമായി വിമർശിച്ച്​ കോൺഗ്രസ്​ രംഗത്തെത്തിയിരുന്നു​. മഹാസഖ്യത്തി​െൻറ വോട്ടുകൾ ഭിന്നിപ്പിക്കുന്ന ഉവൈസിയുടെ പാർട്ടി, ബി.ജെ.പിയുടെ സഖ്യകക്ഷിയെപ്പോലെയാണെന്ന്​ ലോക്​സഭയിലെ കോൺഗ്രസ്​ നേതാവ്​ അധീർ രഞ്​ജൻ ചൗധരി കുറ്റപ്പെടുത്തിയിരുന്നു. കാര്യങ്ങളെ വലിയ അളവിൽ തങ്ങൾക്ക്​ ഉപകാരപ്പെടുന്ന രീതിയിലാക്കി മാറ്റാൻ ഉവൈസിയു​​െട പാർട്ടിയെ ബി.ജെ.പി ഉപയോഗപ്പെടുത്തുകയാണെന്ന്​ അദ്ദേഹം ആ​േരാപിച്ചിരുന്നു. വോട്ടുകൾ ഭിന്നിപ്പിക്കുന്ന ഉവൈസിയുടെ നീക്കങ്ങളെക്കുറിച്ച്​ എല്ലാ മതേതരപാർട്ടികളും കരുതിയിരിക്കണമെന്നും ചൗധരി പറഞ്ഞു.

'കോൺഗ്രസ്​ അവരുടെ നിരാശ മറച്ചുവെക്കാൻ ശ്രമിക്കുകയാണ്​. അവർ പരാജയപ്പെട്ടാൽ ഉവൈസിയെ കുറ്റപ്പെടുത്തും. ബിഹാറിലെ പ്രവർത്തനങ്ങൾ ഞങ്ങൾ അഞ്ച്​ വർഷം മുമ്പ്​ തുടങ്ങിയതാണ്​. സീമാഞ്ചലി​െൻറ വികസനത്തിനായാണ്​ ഞങ്ങളുടെ ​പ്രവർത്തനം' -കോൺഗ്രസി​െൻറ വിമർശനങ്ങൾക്കുള്ള ഉവൈസി മറുപടി നൽകി.