'ഭൂതവും യജമാനനും'; കുനാലി​െൻറ പുതിയ ട്വീറ്റ്​ വൈറലാകുന്നു

സമകാലീന ഇന്ത്യൻ സാഹചര്യങ്ങളെ കൂട്ടിയിണക്കി സ്​റ്റാൻഡ്​ അപ്പ്​ കൊമേഡിയൻ കുനാൽ കംറ പങ്കുവച്ച ട്വീറ്റ്​ വൈറലാകുന്നു. ചിത്രത്തി​െൻറ രൂപത്തിലാണ്​ ഇത്തവണ കുനാൽ ആഞ്ഞടിച്ചിരിക്കുന്നത്​. 'ബോസ്​ യജമാനനോടൊപ്പം'എന്നതല​െക്കട്ടിൽ പ്രധാനമന്ത്രി നരേന്ദ്ര മോദിയുടേയും വ്യവസായി മുകേഷ്​ അമ്പാനിയുടേയും മോർഫ്​ ചെയ്​ത ചിത്രമാണ്​ ട്വീറ്റിലുള്ളത്​. അലാവുദ്ദീനും അത്​ഭുത വിളക്കും എന്ന അറേബ്യൻ ചിത്രകഥയെ ആസ്​പദമാക്കിയുള്ള ചിത്രത്തിൽ മോദി ഭൂതത്തി​െൻറ രൂപത്തിലാണുള്ളത്​. അമ്പാനിയാക​െട്ട വിളക്കുമായി നിൽക്കുകയാണ്​.

കേന്ദ്ര സർക്കാറി​െൻറ കോർപ്പറേറ്റ്​ വിധേയത്വമാണ്​ കുനാൽ പ്രശ്​നവത്​കരിച്ചിരിക്കുന്നത്​. കാർഷിക ബില്ലുകളിൽ ഉൾപ്പടെ രാജ്യം കുത്തകകൾക്ക്​ തീറെഴുതുന്നതായി ആരോപണം ഉയർന്ന സാഹചര്യത്തിൽ ഏറെ പ്രസക്​തിയുള്ള പരിഹാസമാണിതെന്നാണ്​ ട്വീറ്റിന്​ ലഭിച്ച കമൻറുകൾ പറയുന്നത്​. നേരത്തേതന്നെ ഭരണകൂട വിമർശനത്തിലൂടെ ശ്രദ്ധേയനായ ഹാസ്യകലാകാരനാണ്​ കുനാൽ കംറ. സുപ്രീംകോടതിക്കെതിരെ ട്വീറ്റ്​ ചെയ്​തു എന്നപേരിൽ അദ്ദേഹം കോടതിയലക്ഷ്യ നടപടികൾ നേരിടുന്നുണ്ട്​.

ആത്മഹത്യ പ്രേരണാക്കുറ്റത്തിന് അറസ്റ്റ് ചെയ്യപ്പെട്ട റിപ്പബ്ലിക് ടി.വി എഡിറ്റർ ഇൻ ചീഫ് അർണബ് ഗോസ്വാമിക്ക് ജാമ്യം നൽകിയ വിഷയത്തിലായിരുന്നു കുനാലിന്‍റെ ട്വീറ്റ്. സുപ്രീംകോടതിയാണ് രാജ്യത്തെ ഏറ്റവും വലിയ തമാശയെന്ന് ട്വീറ്റ് ചെയ്തതിന് പിന്നാലെ കാവിനിറമണിഞ്ഞ സുപ്രീംകോടതിയുടെ ചിത്രവും പോസ്റ്റ് ചെയ്തിരുന്നു.