കേരളത്തിലെ ചക്ക ഉത്തരേന്ത്യയിൽ ‘മരത്തിൽ പൂക്കുന്ന ഇറച്ചി’

കോഴിക്കോട്​: ബീഫ്​ നിരോധനം കർശനമായി നടപ്പിലാക്കിയ ഉത്തരേന്ത്യൻ സംസ്​ഥാനങ്ങളിൽ ഇറച്ചിക്ക്​ പകരം ഉപയോഗിക്കുന്നത്​ കേരളത്തിൽ നിന്നുള്ള ചക്കവിഭവം. പാകമാവാത്ത ചക്കയെ സംസ്​കരിച്ചാണ്​ ചക്കയെ ഇറച്ചി പോലുള്ള വിഭവമായി മാറ്റുന്നത്​. ‘മരത്തിൽ പൂക്കുന്ന ഇറച്ചി’ എന്ന പേരിലാണ്​​ ഇൗ വിഭവം വിപണിയിൽ അറിയപ്പെടുന്നത്​​.

കിലോക്ക്​ 80 മുതൽ 100 രൂപ വരെയാണ്​ വില. കേരളത്തിലെ കാപ്പിത്തോട്ടങ്ങളിൽ നിന്നാണ്​  മുംബൈ, ഒറീസ, ഇ​ൻഡോർ, മൈസൂർ, ബീഹാർ, ഉത്തർപ്രദേശ്​ തുടങ്ങിയ സംസ്​ഥാനങ്ങളിലേക്ക്​ ചക്ക കയറ്റി അയക്കുന്നത്​. വയനാട്ടിൽ നിന്നാണ്​​ ഇൗ വർഷം ഏറ്റവും കൂടുതൽ ചക്ക കയറ്റുമതി ചെയ്​തിരിക്കുന്നതെന്നാണ്​ കൃഷി വകുപ്പ്​ നൽകുന്ന വിവരം. ഡിസംബർ മുതൽ ഏപ്രിൽവരെയായി ഏതാണ്ട്​ 400 ടൺ ചക്ക കയറ്റി അയച്ച്​ കഴിഞ്ഞു​.

കാപ്പിത്തോട്ടങ്ങളിൽ ശക്​തമായ സൂര്യപ്രകാശത്തെ തടയാനാണ്​ കർഷകർ പ്ലാവ്​, മാവ്​ തുടങ്ങിയ മരങ്ങൾ വെച്ചുപിടിപ്പിക്കുന്നത്​. ഇത്​ വളർന്ന്​ പാകമാവുന്നതോടെ കായ്​ക്കാൻ തുടങ്ങും. എന്നാൽ, ചക്ക പാകമാവാൻ കാത്തിരുന്നാൽ കാട്ടാനക്കൂട്ടം മണം പിടിച്ച്​ കൂട്ടമായി ചക്ക തിന്നാ​ൽ തോട്ടത്തിലെത്തും. ചക്ക തിന്നാനുള്ള വ്യഗ്രതയിൽ ഇവറ്റകൾ കാപ്പികൃഷിയും നശിപ്പിക്കുമെന്നാണ്​ കർഷകർ പറയുന്നത്​. ഇത്​ മുൻകൂട്ടി കണ്ടാണ്​​ പാകമാവുന്നതിന്​ മുമ്പ്​ ചക്കകൾ പറിച്ചിടുന്നത്​.

ആദ്യ ഘട്ടത്തിൽ ആവശ്യക്കാരില്ലാത്തതിനാൽ കൃഷിയിടത്തിൽ തന്നെ ചീഞ്ഞുനാറുകയാണ്​ പതിവ്​. നാട്ടിൽ പുല്ലുവിലയായി കണ്ടിരുന്ന ചക്കക്ക്​ പൊന്നും വില കിട്ടുമെന്നറിഞ്ഞതോടെ ആവശ്യക്കാരും ഏറിയിരിക്കുകയാണെന്നാണ്​ കർഷകർ പറയുന്നത്​. പാകമാവാത്ത ചക്ക കിലേക്ക്​ 10 രൂപ വെച്ച്​ ഇപ്പോൾ കർഷകർക്ക്​ ലഭിക്കുന്നുണ്ട്​​. ഇങ്ങനെ ശേഖരിക്കുന്ന ചക്ക കിലോക്ക്​ 18 രൂപക്കാണ്​ ഇടനിലക്കാർ വാങ്ങുന്നത്​. തുടർന്നാണ്​ ഇവ സംസ്​കരണത്തിനായി കൊണ്ടു പോകുന്നത്​. പാകമായ ചക്കകൾ ജ്യൂസായി വിദേ​ശത്തേക്ക്​ കയറ്റി അയക്കുന്നുമുണ്ട്​.

വലിയ ലോറികളിൽ നിറച്ച്​ ​മുകളിൽ െഎസ്​ കട്ടകൾ നിറച്ചാണ്​ ചക്കകൾ കൊണ്ടു പോകുന്നത്​. ദിവസങ്ങൾ നീളുന്ന യാത്രക്കിടയിൽ ചക്ക ചീഞ്ഞു പോകാതിരിക്കാനാണ്​ ​െഎസ്​ കട്ടകൾ വെക്കുന്നത്​. വയനാട്ടിലെ മീനങ്ങാടി, മാനന്തവാടി, ഇരുളം എന്നിവിടങ്ങളിൽ നിന്നും കർണാടകയിലെ കൊടക്​ എന്നിവിടങ്ങളിലെ കാപ്പിത്തോട്ടങ്ങളിലാണ്​ ഏറ്റവും കൂടുതൽ പ്ലാവുകളുള്ളത്​.